ОХУ-ын Ерөнхийлөгч В.Путин Оросоос нийлүүлсэн байгалийн хийн төлбөрийг Украин улс төлөлгүй хойшлуулсаар байгаа нь нөхцөл байдлыг ноцтой болгож буйг Европын холбооны удирдагчдад сануулж арга хэмжээ авахыг хүссэн тухай “ВВС” агентлаг мэдээлэв. В.Путин “Украины эх газраар дайран өнгөрч буй дамжуулах хоолойгоор Оросын байгалийн хийг Европын 20 гаруй оронд нийлүүлдэг. Украины санхүүгийн хямралаас болж хэдхэн сарын дараа Европ даяараа хийн хомсдолд орох эрсдэлтэй байна” хэмээн мэдэгджээ.

ОХУ-ын Газпром компаниас “Украинчуудын байгалийн хий авсан өр хоёр тэрбум ам.доллар буюу 1.4 тэрбум еврод хүрсэн. Газпром компани төлбөрөө яаралтай төлөхийг украинчуудаас шаардаж байгаа хэдий ч Путин Европын холбоотой тохиролцоонд хүртэл хүлээх хэрэгтэй байна” хэмээн мэдэгдсэн байна.

Хэрэв Украины өрийн асуудлыг цэгцлэхгүй бол Европчууд байгалийн хийн хомсдолд орж болзошгүй байгааг Украины Ерөнхий сайд Арсений Яценюкт мөн сануулсан байна. Тэрбээр “Украин санхүүгийн хувьд уналтад орсон. Бид  зээл өгөх орнуудыг судалж байгаа” гэжээ.

Б.Дэлгэрцэцэг