Реалити шоуны од Ким Кардашиан ирэх тавдугаар сарын 21-нд Ром хотноо болох хуримынхаа ёслолд Ерөнхийлөгч Барак Обамаг урьсан тухай “Hollywood.com” мэдээллээ. Ким Кардашиан өөрийн блогтоо Ерөнхийлөгчдөө хандаж “Обама ахаа та дэндүү ядарсан харагдаж байна. Би мэднээ надад дургүйг чинь. Тэгэхдээ Америкт сүүлийн үед толгой өвдөх асуудал их байгаа учир би гол зүйлээ хэлье. Кардашиан миний бие танд гайхалтай санал тавъя. Ирэх сард болох Кейни Уэст бид хоёрын хуриманд ирж, жинхэнэ аз жаргал гэж юу болохыг мэдрэхийг хүсвэл залгаарай. Би хүлээж байя” хэмээн утасны дугаараа бичиж үлдээжээ.

Ким ийнхүү бичсэний төлөө хэл амны бай болоод байгаа юм. Олон нийтийн сүлжээнд “Кимээ, олны анхааралд орохын тулд гэнэн охин шиг аашлах хэрэггүй. Ерөнхийлөгчид битгий дараа болоод бай” хэмээн шүүмжилж, “өмнөх хурим шиг 72 цагийн настай байх болтугай” хэмээн хараажээ.

Тэрбээр 2011 онд сагсан бөмбөгийн тамирчин Крис Хамфристэй хуримлаад 72 цагийн дараа салах өргөдлөө гаргаж байсан. Ким салсан шалтгаанаа “Крис Хамфрисийн дээрэнгүй занг тэвчихэд үнэхээр бэрх байсан” гэж тайлбарлаж байсан билээ.

Б.Дэлгэрцэцэг