Сураггүй болсон Малайзын агаарын тээврийн “МН370” онгоцны хар хайрцагны цэнэг дуусахаас урьтаж олохын тулд Австралийн Засгийн газар шинэ төхөөрөмж туршихаар болсон тухай “ВВС” агентлаг мэдээлэв. “Bluefin-21” буюу далайн ёроол дахь биет, амьдралыг судлах төхөөрөмжийг өнөөдрөөс эхэлж онгоц осолдсон Энэтхэгийн далайн гүнд байршуулахаар болжээ.

Австралийн Ерөнхий сайд Тони Аббет “Хайх ажиллагаанд ахиц гаргахын тулд “Bluefin-21” төхөөрөмжийг туршиж, осолдсон онгоцыг илрүүлэхээр боллоо. Энэ төхөөрөмж далайн ёроолд амжилттай газардаж чадвал ойр орчмын 200-300 метрт байрлах биетийг мэдрэх чадвартай” гэж мэдэгджээ.

Өнгөрсөн долоо хоногт Энэтхэгийн далайн зүүн хойд хэсгээс 2-3 удаа дохио ирсэн юм. Аврагчид дохио ирсэн хэсгийг нэг бүрчлэн самнаж байгаа ч өнөөг хүртэл онгоцноос ямар ч сураг гаргаагүй байна.

Б.Дэлгэрцэцэг