Өмнөд Солонгосын Инчон хотоос Чежү арлыг чиглэн зорчиж явсан “Sewol” аяллын хөлөг онгоц Өмнөд Чолла мужийн Жиндо арлын ойролцоо өчигдөр 8.58 цагт осолдож, живсэн. “Sewol” онгоцонд зорчиж явсан 475 хүнээс 179 зорчигчийг авраад байгаа аж. Өмнөд Солонгосын албаныхны мэдээлснээр “Ослоор 9 хүн нас барсныг тогтоогоод байна. 287 хүн ор сураггүй хэвээр байгаа” гэдгийг онцлоод сэтгэлийн тэнхээтэй байхыг сануулсан байна. Амь үрэгдсэн хохирогчдын дөрөв нь 17 настай ахлах ангийн сурагч байсан бол хоёр нь онгоцны ажилчид байжээ. Өмнөд Солонгосын албаныхан ослын шалтгааныг бүрэн тодруулаагүй байгаа боловч гэрчүүдийн мэдээллэснээр хөлөг онгоц хад мөргөснөөс живж осолдсон байх магадлалтай гэжээ.

 “Sewol” онгоц өчигдөр 9.50 цагт далайд бүрэн живсэн байна. Өмнөд Солонгост аяллын онгоц осолдож байгаа анхны тохиолдол биш юм. Өмнө нь 1970 онд 323 зорчигчтой, 1993 онд 292 зорчигчтой онгоц осолдож бүх зорчигч амиа алдаж байжээ. Мөн 2007 онд 14, 2009 онд 16 зорчигч сураггүй алга болж байсан гэнэ.

Б.Дэлгэрцэцэг