Өчигдөр Ираны төв телевизээр тус улсын нутагт унасан АНУ-ын нисгэгчгүй тагнуулын онгоцыг харуулсан байна. Өнгөрсөн долоо хоногт америкийн нисгэгчгүй онгоцыг Ираны хилээр нэвтрэхэд нь буудан устгасан тухай мэдээллүүд дэлхий даяар шуугиан дэгдээсэн билээ. Тэгвэл иранчууд унагасан онгоцоо бахархалтайгаар төв телевизэрээ иргэддээ үзүүлсэн байна. Тусгайлан бэлдсэн тавцан дээр цагаан өнгийн нисгэгчгүй онгоцыг байрлуулж ард нь төрийн далбаан дээр шашныхаа тэргүүн Аятолла Хомейниг байрлуулсан зураг өлгөн онгоцны далавчнаас хохимой толгой зурсан америкийн далбааг байрлуулжээ. Тус нисгэгчгүй онгоцны технологийг ираны цэргийн мэргэжилтнүүд судлаж шинжилж байгаа тухай Исламын хувьсгалт гвардийн командлагч бригадын генерал Амир Али Хажизадех энэхүү мэдээлэлд дурджээ.