АНУ-ын Ерөнхийлөгч Барак Обама хоёр Солонгосын гадаад хэргийн сайд нартай утсаар ярьсан тухай “Korean Central News Agency” мэдээллээ. Обама өнөөдөр өглөөний 7.15 цагт Өмнөд Солонгосын гадаад хэргийн сайд Юн Бен Сэтэй утсаар ярьж, осолдсон хөлөг онгоцтой хамт живсэн зорчигчдыг аврах ажиллагаанд АНУ туслалцаа дэмжлэг үзүүлэхээ мэдэгджээ. Мөн Хойд Солонгосын гадаад хэргийн сайд Пак Ы Чунтэй ярьсан аж. Обама удирдагч Ким Чен Унтай уулзах хэлэлцээрийн ширээний ард суух хүсэлтэйгээ илэрхийлээд, гурван улсын энхийн хэлэлцээр хийхийг санал болгосон байна. Тэрбээр “АНУ Хойд Солонгос гадаад дотоод харилцаагаа бататгаж, нэг нэгэндээ хүлээцтэй хандахыг хүснэ. Хойд Солонгос улсын удирдагч АНУ-д түүхэн айлчлал хийхийг санал болгож байна. Бид дайсагнасан хүйтэн харьцаагаа ширээний ард сууж нэг нэгнээ анхааралтай сонссон цагт энэ бүх асуудалд цэг тавих болно. Та хүсэлтийг минь уламжилж өгнө үү” гэжээ.

Цагаан ордны хэвлэл мэдээллийн албанаас “Барак Обама хоёр Солонгосын нэгийг нь онцлохгүйгээр утсаар ярилцсан. Обама алдаагаа ухамсарлаж, Хойд Солонгосыг үргэлж дайсан мэтээр ханддаг байсан бол Өмнөд Солонгост дэмжлэг туслалцаа үзүүлдэг нь гурван улсын дунд хүйтэн харьцаа бий болгосон хэмээн үзсэн. Тиймээс Ерөнхийлөгч энэ сарын сүүлчээр Вашингтонд хоёр Солонгосын удирдлагуудыг хүлээн авах хүсэлтэйгээ гадаад хэргийн сайд нарт уламжилсан” гэж мэдээллээ. Өмнөд Солонгосын гадаад хэргийн сайд Обамагийн саналыг хүлээн авсан тухай “Yonhapnews.co.kr” мэдээлсэн байна.

Б.Дэлгэрцэцэг