ОХУ-ын Ерөнхийлөгч Путиний экс эхнэр Людмилад нэгэн эр гэрлэх санал тавьсан тухай “Trud.com” мэдээллээ. Ерөнхийлөгч хэдхэн хоногийн өмнө телевиз, радио станцуудаар олон нийттэй шууд ярилцлага хийх үеэрээ “Би хуучин эхнэрээ хүнтэй суулгасны дараа эхнэр авах эсэхээ бодох болно” хэмээн хариулсан билээ. Тус ярилцлага цацагдсаны дараа Новосибирск хотын оршин суугч Юрий Бабин гэгч Путиний экс эхнэр Людмилатай гэрлэхийг хүсч байгаагаа мэдэгдэж, хамтын амьдралд нь туслахыг хүссэн байна. Бабин Орос улсад “Сохор зоосны саятан” гэдгээрээ алдартай юм. Тэрбээр 2012 оны арванхоёрдугаар сард таван сая ширхэг зоосны цуглуулгаа 19.9 сая рублиэр худалдаалж байсан юм.

Юрий Бабин эхнэр авах тухайгаа “Би 2008 оноос ганц бие амьдарч байгаа. Тийм учраас Людмила Александровнатай суухыг хүсч байна. Миний хүсэл биелнэ гэж найдаж байна” гэж ярьжээ. Хэвлэлийнхэн түүнээс хэрхэн Людмилад гэрлэх саналаа тавих гэж байгааг асуухад “Хэвлэл мэдээллийн байгууллагуудаас Людмила олж мэднэ гэж найдаж байна. Тэр надад зөвшөөрнө гэдэгт итгэж байна. Би явлаа, сүм рүү залбирал үйлдэхээр” гэж хариулжээ.

Б.Дэлгэрцэцэг