Малайзын агаарын тээврийн 239 зорчигчтой “МН370”  онгоц сураггүй болоод хоёр сарын хугацаа өнгөрлөө. Өнөөдөр тус улсын Ерөнхий сайд Нажиб Разак “МН370” онгоцны бүх зорчигчдыг амьд, хайх ажиллагааг онгоцыг олох хүртэл цуцлахгүй гэж мэдэгдсэн тухай “ВВС” агентлаг мэдээллээ. Тэрбээр “Malaysian national agency”-ээр зорчигчдын гэр бүл болон олон улсад хандаж, “Баттай нотолгоо олохоос нааш зорчигчдыг нас барсан гэж дүгнэхгүй. Тэд одоо хүртэл амьд байгаа” гэжээ. Тус улсын Засгийн газарт зорчигчдын ар гэрийнхэнд нас барсан гэсэн гэрчилгээ өгөх асуудал сөхөгдөөд байгаа аж. Монтреалын конвенцын дагуу зорчигчийг нас барсан гэж дүгнэх хугацаа болоогүй тул уг саналыг түр хойшлуулаад байгаа гэнэ.

Өнгөрсөн сард Ерөнхий сайд Нажиб Раказ онгоц Энэтхэгийн далайд сүйрсэн гэж зарласан ч өнөөг хүртэл ямар нэгэн ул мөр олдоогүй байна. Зорчигчдын ар гэрийнхэн “Онгоц газарт, далайд ч олдохгүй байна. Тэгэхээр зорчигчид амьд байгаа нь гарцаагүй” гэж үзэж байгаа юм. Ар гэрийнхэнд нь тэднийг амьд гэсэн найдлага байгаа тул онгоцыг олоогүй байж нас барсаны гэрчилгээ олгох асуудал ярьсан Засгийн газраа буруутгажээ.

Б.Дэлгэрцэцэг