АНУ-ын Цагаан ордны нээлттэй хаалганы өдрийг тохиолдуулан ордны ажилчдын 50 гаруй хүүхэд багачууд тэргүүн хатагтай Мишель Обаматай уулзаж, нэг өдрийг хамтдаа өнгөрүүлжээ. Энэ үеэр нэг ажилтны охин аавдаа ажил олж өгөөч хэмээн тэргүүн хатагтайд хандаж, аавынхаа танилцуулгыг өгсөн тухай “www.washingtontimes.com” мэдээллээ.

Аавдаа ажил олж өгөхийг хүссэн охиныг Шарлот Белл гэдэг, тэрбээр 10 настай аж. Охины ээж нь Цагаан ордонд ажилладаг ч аав нь сүүлийн хоёр жил ажилгүй байгаа юм байна. Тиймээс тэргүүн хатагтай л түүнд ажил олж өгч чадна хэмээн найдсан охин эцэг эхдээ ч хэлэлгүй аавынхаа танилцуулгыг ийнхүү Мишель Обамад өгчээ. Охин тэргүүн хатагтайд хандаж “Аав минь их сайн хүн. Даанч аавд минь ямар ч ажил олдохгүй байна” гэж хэлжээ.

Охины энэ үйлдлийг тэргүүн хатагтай ихэд өхөөрдөж, танилцуулгыг хүлээн авч боломжоороо туслахаа амласан байна. Охины аав 2012 онд Барак Обамагийн сонгуулийн компанит ажилд оролцож байжээ.

Б.Дэлгэрцэцэг