Инчон хотоос хөдөлсөн “Sewol” хөлөг онгоц Чолла мужийн Жиндо арлын ойролцоо осолдсоны улмаас Ансон дунд сургуулийн 137 сурагч амиа алдсан. Тус сургуулийн багш сурагчид өнөөдөр амиа алдсан сурагчдад хүндэтгэл үзүүлсэн тухай “yonhapnews.co.kr” мэдээллээ. Тус агентлаг “Сөүлээс Чолла муж руу ирэх хүмүүсийн урсгал их байна. Мөн сурагчид болон амиа алдсан хүмүүсийн гэрэл зургийг байрлуулсан цогцолборын гадна хэдэн мянган иргэн дугаарлан зогсч эмгэнэл илэрхийлсээр байгаа юм. Ансон сургуулийн удирдлагууд “дөрөвдүгээр сарын 28-ны өдрийг амиа алдсан сурагчдыг дурсах өдөр” болгон зарласан” гэж мэдээлжээ.

Чолла мужийн засаг захиргаа хөлөг онгоцны ослоор амиа алдсан зорчигчдын гэрэл зургийг олимпийн цогцолбор хороололд байрлуулсантай холбоотойгоор Сөүл, Бусан хотоос хүндэтгэл үзүүлэхээр олон мянган иргэн тус мужийг зорьж байгаа гэнэ. Мөн Засгийн газраас тэдний аюулгүй байдлыг хангахаар олон тооны цагдааг олимпийн цогцолборын орчим ажиллуулж байна.