Ирэх сарын 06-ны өдрөөс эхлэн Толгойт-Амгалангийн чиглэлд зорчигчдод үйлчлэх рэйлбусийг маргааш хүлээж авахаар болжээ.

“Улаанбаатар төмөр зам”-аас РА-2 маягийн 136 хүний суудалтай, 350-400 хүн зорчих боломжтой, нэг замтай үед өдөрт гурван удаа, хос замтай үед өдөрт зургаан удаа 100 км/цагийн хурдтай, Толгойт-Амгалангийн чиглэлд 47 минут, Амгалан-Толгойтын чиглэлд 45 минут зорчих “Railbus”-ыг оруулж ирж, хотын нийтийн тээвэрт явуулахаар болсон.

Улаанбаатар хотын дундуур дайран өнгөрч буй төмөр замыг чөлөөтэй үед нь нийтийн тээвэрт ашиглах, авто замын түгжрэлийг сааруулах, иргэд зорчигчдын тохь тухыг хангаж, цаг хугацааг хэмнэхийн тулд төмөр замын автобус явуулж байгаа юм.

Шинэ рэйлбусыг хүлээж авах ёслолын ажиллагаа маргааш 11:30 цагт “Улаанбаатар төмөр зам”-ын төв буудалд болох ба уг үйл ажиллагаанд Зам, тээврийн сайд А.Гансүх, Нийслэлийн Засаг дарга бөгөөд Улаанбаатар хотын захирагч Э.Бат-Үүл болон холбогдох албаны хүмүүс урилгаар оролцох юм байна.

Өнгөрөгч долоо хоногт МИАТ компани хоёр дахь шинэ Боинг онгоцоо, УБТЗ-ынхан шинэ суудлын вагонуудаа хүлээж авсан билээ.

Б.Буд