Өмнөх нийтлэлээрээ 2008-2012 онд Зам, тээвэр, барилга, хот байгуулалтын сайд асан X.Баттулга төсвийн хөрөнгө болон БНХАУ-ын хөнгөлөлттэй зээлээр 64 сая ам.долларын Хятад улсад үйлдвэрлэсэн зүтгүүр зэрэг зүйл  авсан нь  ашиглагдахгүй үзмэр болсон талаар өгүүлсэн. Мөн тус үзмэрийг авахад зориулан БНХАУ-аас авсан хөнгөлөлтэй зээлийн хүү 2 тэрбум төгрөг даваад явж буй тухай “бахдам сайхан” түүхийг өгүүлсэн билээ.

1

Энэ удаад төсвийн хөрөнгөөр энгүй сайхан  илчит тэрэг авсан түүхийг хүүрнэе.

Төмөр замын хөдлөх бүрэлдэхүүнийг нэмэгдүүлэх зорилгоор 2008 онд гурван илчит тэрэг авах тендер зарлаж мөн оны наймдугаар сард АНУ-ын “Женерал электрик” компани нэг, монголын "СТС" ХХК хоёр илчит тэргийг нийлүүлэхээр шалгарчээ.

1

“Женерал электрик” гэрээний хугацаанд асуудалгүй илчит тэрэг нийлүүлсэн байдаг.

1

Харин 2008 оны есдүгээр сарын 26-ны өдөр “СТС” ХХК-тай байгуулсан хоёр илчит тэрэг нийлүүлэх 8 999 920 820 төгрөгийн дүнтэй гэрээн (№ИТ02/2008)  дээр “төсвийн хөрөнгө уйлдаггүй нь сайхан” хэмээх алдарт хэлцэд бүрэн нийцэх үйл явц өрнөжээ. Тус гэрээнд захиалагч талыг төлөөлж “МТЗ” ТӨХК болон Сангийн яамны төлөөлөл гарын үсэг зурсан байдаг.

1

Тус гэрээний хүрээнд “СТС” ХХК хоёр илчит тэргийг 2008 оны арванхоёрдугаар сарын 15-ны өдөр нийлүүлэх үүрэг хүлээсэн ч эхний илчит тэрэг 2009 оны наймдугаар сард нийлүүлэгджээ. Гэрээний хугацаа зөрчигдсөнийг эндээс харж болно. Энэ 2ТЭ116-MR2001 илчит тэрэг туршилтын аялал хийх явцад “Б” секцийн генератор нь буудаж зогссон байна. 2010 оны дөрөвдүгээр сарын 05-ны өдрийн шалгалтын танилцуулгад дурьдсанаар гэмтэл гарч зогссоноос хойш ашиглагдаагүй. Тус зүтгүүрийг түрээслүүлэн ашиглаж болох байсан хугацаа нь гэрээнд заасан хугацаанд нийлүүлээгүй алдсан 8 сар, нийлүүлсэн хугацаанаас хойш гэмтэл гарч мэдэгдэж байгаа ашиглагдаагүй хугацаа 8 сар, нийт 1 жил 4 сар. Энэ хугацаанд түрээслүүлэн ашиглаж төвлөрүүлж болох байсан  орлогыг хэн төлөх нь тодорхойгүй.

1

Мөн шалгалтын явцад уг илчит тэргийг өмнө нь ашиглаж байсан хуучин илчит тэрэгний рам,  тэргэнцэр дээр угсарсан болох нь тогтоогдсон байдаг.

1

Төсвийн 8 999 920 820 төгрөгөөр илчит тэрэг авсан түүх ийм байна. /2008 оны арванхоёрдугаар сард нийлүүлэгдэх ёстой байсан хоёр дох зүтгүүр мөн л 2010 оны дөрөвдүгээр сарын 05-ны өдрийн шалгалтын танилцуулгад дурьдсанаар огт нийтлүүлэгдээгүй байжээ/

1

Үргэлжлэл бий...

1

Б.Сарнай