Энэ жилээс анх удаагаа Олон улсын оюун ухааны спортынхныг нэгэн дор чуулуулж эхлэж байгаа Фиде-гийн ивээл дор зохион байгуулах болсон Чин Ван Ханддоржийн нэрэмжит “Монгол туургатан-2011” шатрын нээлттэй тэмцээн өчигдөр өндөрлөж дүнгээ гаргалаа. А, Б гэсэн хоёр зэрэглэлд аварга шатарчин тодруулсан энэ тэмцээн Улаанбаатар хотноо 5 өдөр үргэлжилсэн юм. А зэрэглэлд ОУМ Ц.Батчулуун 7 оноогоор түрүүлж 1500 долларын эзэн болсон боллоо. Ингэснээр Ц.Батчулуун их мастерын болзол хангалаа. Түүний хувьд МУ-аас төрөн гарч байгаа 5 дахь их мастер болж байгаа юм. Тэрээр нийт 9 өрөг тоглохдоо тав хожиж дөрөв тэнцсэнээр нэг ч хожигдолгүй тэмцээнийг дуусгасан. Олон улсын цол зэрэг олгохоороо онцлогтой энэ тэмцээний дэд аварга болсон ОУМ Б.Гүндаваа их мастерын нэг балл авсан юм. Харин 3-р байрт Туркийн их мастер Хазнедароглу шалгарсан. Тэгвэл энэ тэмцээний хамгийн өндөр чансаатай шатарчин ОХУ-ын их мастер Антон Шомоев 4-р байр эзэллээ. Харин “Мончесс” клубын шатарчин, ШШГЕГ-ын дэргэдэх “Сүлд” спортын хорооны тамирчин их мастер Т.Батчимэг 5-р байр эзэлж мөн эрэгтэй ОУМ-ын болзол биелүүллээ. Манай улсаас А зэрэглэлийн тэмцээнд Их мастер Хатанбаатар, Шаравдорж, Их мастер Б.Мөнгөнтуул, Т.Батчимэг, ОУМ Ц.Батчулуун, Б.Гүндаваа тэргүүтэй шилдгүүд оюун ухаанаа сорин өрсөлдсөн юм. “Б” зэрэглэлийн рапидын тэмцээнд 126 шатарчин оролцсоноос спортын мастер С.Ган-Од 7,5 оноогоор тэргүүлж ОУМ Н.Баттулга, Фиде мастер Д.Эрхэмбаяр нар удааллаа. Харин Б ангилалд хамгийн өндөр амжилт үзүүлсэн “Мончесс” клубын тамирчин, ОУМ Д.Янжиндулам тусгай шагнал хүртсэн юм. Мөн зургаан төрөлд 30 орчим шатарчныг тусгай шагналаар шагнасан бол тэмцээнд оролцогчдын хамгийн залуу нь 6 настай Амартүвшин байсан. Харин хамгийн ахмад нь Ж.Лхагваа байлаа. Анх удаагаа Фидегийн ивээл дор болсон энэ тэмцээнийг Дэлхийн Монголуучыдн чуулган, МШХ, ГХЯ, Урамтай шатар клуб хамтран амжилттай зохион байгууллаа. А.Алтанчимэг