Өмнөд Солонгосын нийслэл Сөүлээс холгүй орших Гунпо хотын метронд өчигдөр оройны 20 цагийн орчимд дэлбэрэлт болж 11 хүн гэмтсэн тухай “Yonhapnews.co.kr” мэдээллээ. Тус метронд 240 гаруй хүн зорчиж байжээ. Орон нутгийн цагдаа нар метронд ямар шалтгаанаар дэлбэрэлт болсныг илрүүлэхийн тулд мөрдөх ажиллагааг эхлүүлсэн байна. Гунпо хотын захирагч И Пак Хэ дэлбэрэлтийн улмаас бэртсэн хүмүүсийн эмчилгээний зардлыг даахаа мэдэгдэж, огцорч буйгаа зарлажээ. Тэрбээр “Миний алдаанаас болж дэлбэрэлт боллоо. Азаар хүний амь нас эрсдээгүй ч гэмтсэн хүмүүсийн хариуцлагийг үүрч, албан ёсоор огцорч буйгаа зарлаж байна” хэмээв. Мөрдлөгийн эхний тайланд дурьдсанаар цахилгааны богино холбооноос үүдэн дэлбэрэлт болсон гэжээ. Өнөөдрөөс эхлэн дэлбэрэлт болсон “MK-21” метрог сэргээн засварлаж, хөдөлгөөнд оролцуулж эхэлсэн аж.

ө

Б.Дэлгэрцэцэг