Эдүгээ УИХ Эдийн засгийн 100 хоногт эрчимжүүлэх үүргийг Засгийн газарт өгсөн. Засгийн газрын дэргэд Эдийн засгийн зөвлөл байгуулагдан  богино хугацаанд хүндэрсэн эдийн засгаа өөд татахаар ажиллаж байгаа билээ. Гэвч тус зөвлөл, бизнесийнхнээс үл хамаарч, ажил гацах тал анзаарагсан байна. Учир нь өнгөрсөн долоо хоногт УИХ-ын чуулганаар 12 хуулийн төсөл хэлэлцсэний ес нь эдийн засаг, хөрөнгө оруулалт, татварын орчинтой холбоотой асуудал байжээ. Гэвч зарим хуулийн төсөл хуралдааны ирц бүрдээгүйгээс хойшилсон байна. Тиймээс Ерөнхий сайдын дэргэдэх Эдийн засгийн зөвлөлийн нарийн бичгийн дарга Б.Бямбасайхан "Өнөөдөр Монголд үйл ажиллагаа явуулж байгаа бизнесийн хурд болоод төрийн ажил хоёр  хоорондоо зөрчилддөг. Бизнесийнхэн асуудлаа аль болох хурдан шийдээд явахыг хүсдэг. Гэтэл өнөөдөр төрийн үйл ажиллагааны хурд зарим тохиолдолд бизнесийн хурдаа гүйцэхгүй байна. Жишээлбэл, өнгөрсөн  долоо хоногт  УИХ дээр хууль хэлэлцэж байхад ирц хүрэхгүй байх асуудал гарсан байна лээ. Бизнес эрхлэгч бидний зүгээс хууль эрхзүйн орчноо хурдан сайжруулж,  УИХ-аар цаг тухайд нь хэлэлцээд батлаад яваасай гэдэг хүсэлттэй байдаг" хэмээсэн юм.  Үнэхээр ч төр, бизнес хоёр хоорондоо ажлын уялдаатай, нэгдсэн санаатай  байж өнөөдрийн хүндхэн байгаа  эдийн засгаа хөл дээр нь босгох  байх. Тиймээс төрийнхөн   бизнесийн хурдаар ажиллах болж дээ. Дээрх чин үнэн шүүмжлэлийг ч хүлээж авах биз ээ, эрхэм түшээд.

5

Н.Нягт