Тайландын эрхэмсэг ханхүү Маха Важиралонгкорны эхнэр, гүнж Шрирасмийн хагас нүцгэн бичлэг цахим хуудсанд тавигдсанаас болж тус улсад интернэт орчинд хориг тавьж эхэлсэн тухай “www.malaysia-chronicle.com” мэдээллээ. Зэвсэгт хүчний тэргүүн, генерал Прают Чан Оча “Эхний ээлжинд гүнжийн бичлэг тавигдсан “MailOnline” цахим хуудсыг хаалаа” гэж мэдэгджээ. Тайландын хуульд Эзэн хаан, түүний гэр бүлийнхнийг ямар нэг байдлаар гутаан доромжлохыг хориглоно гэж заасан байдаг бөгөөд энэ бичлэг нь уг хуулийн заалтыг зөрчсөн гэж үзсэн учир “MailOnline” хуудсыг хааж, интернэт орчинд тавьсан хоригоо улам чангатгажээ.

.

Тус улсын эрх баригчид хэдэн сарын өмнө насанд хүрэгчдэд зориулсан, оюуны бүтээлийг хуулбарласан сайтууд болон видео тоглоомуудыг хориглоод байсан юм. Дээрх хэргээс үүдэж 200 гаруй сайтыг армийнхан хяналтандаа авч 84 сайтыг хааж, удирдлагуудыг нь барьж хорьжээ.

.

Тайландын эзэн хааныг доромжилсон хүн хуулийн дагуу 15 жилийн хорих ялаар шийтгүүлдэг билээ. Гурван жилийн хугацаанд эзэн хаанаа доромжилсон гэх шалгаанаар 22 хүн 10 дээш жилийн ял авсан юм. Хорих ял авсан ихэнх иргэн олон нийтийн сүлжээнд сэтгэгдэл бичсэнээсээ болж бурууджээ.

.

Б.Дэлгэрцэцэг