Эдийн засгийн болон Байгаль орчин, хүнс, хөдөө аж ахуйн байнгын хорооны хамтарсан хуралдаанаар Засгийн газрын гишүүнийг томилох асуудлыг хэлэлцсэн юм. Засгийн газраас ҮХАА-н сайдад УИХ-ын гишүүн, Хуульзүйн байнгын хорооны дарга Ш.Түвдэндоржийг томилох саналыг танилцууллаа. Үүнтэй холбогдуулан байнгын хорооны гишүүд ЗГХЭГ-ын дарга Ч.Сайханбилэг, нэр дэвшигч Ш.Түвдэндорж нараас сонирхсон асуултдаа хариулт авав.

6

УИХ-ын гишүүн Н.Номтойбаяр:

-Монгол Улсын Ерөнхийлөгчтэй зөвшилцсөн гэж Ч.Сайханбилэг сайд танилцуулгадаа дурдлаа. Зөвшилцлийн үр дүн хэлэхгүй юу? Нэр дэвшигчийг дэмжиж байгаа ч зарчмын асуудал байна. Таны дадлага туршлагаас харахад парламентын ёс, түүний Засгийн газарт тавих хяналтыг дэмжинэ гэдэгт эргэлзэхгүй байна.

6

ЗГХЭГ-ын дарга Ч.Сайханбилэг:

-Засгийн газраас Монгол Улсын Ерөнхийлөгчтэй тавдугаар сарын 19-нд албан бичиг явуулж, зөвшилцөх саналаа хүргүүлсэн. Үүний хариу тавдугаар сарын 29-ний өдөр Монгол Улсын Ерөнхийлөгчөөс ирсэн. "Таны ирүүлсэн албан бичигтэй танилцлаа. Засгийн газрын гишүүнээр  улс төрийн өндөр албан тушаалд ажиллаж байгаа хүний нэрийг давхардуулан дэвшүүлэхгүй байх нь зүйтэй" гэдэг саналаа Ерөнхийлөгч илэрхийлсэн. Процесийн хувьд ийм байна. Хуулийн тайлбарыг танилцуулъя. Монгол Улсын Үндсэн хуулийн 39 дүгээр зүйлийн 2 дахь заалтаар "Монгол Улсын Ерөнхий сайд Засгийн газрын бүтэц, бүрэлдэхүүн, түүнд өөрчлөлт оруулах саналаа Ерөнхийлөгчтэй зөвшилцөн УИХ-д өргөн мэдүүлнэ. Ерөнхий сайд уг асуудлыг Ерөнхийлөгчтэй долоо хоногийн дотор зөвшилцөж чадаагүй бол УИХ-д өөрөө өргөн мэдүүлнэ" гэсэн заалттай.  Улсын дээд шүүхийн тогтоолоор Ерөнхийлөгчийн тухай хуульд заасан "зөвшилцөх" гэдгийг хууль тогтоомжид өөрөөр тодорхойлоогүй бол "Ерөнхийлөгч, УИХ буюу Ерөнхий сайд тодорхой бүрэн эрхээ хэрэгжүүлэхдээ хуульд бүрэн эрхээр хамаарч асуудлаар  өөрийн гаргаж буй шийдвэр, авах арга хэмжээнийхээ талаар хуульд заасан албан тушаалтантай санал солилцохыг ойлгоно" гэж заасан байдаг. Мөн тайлбар дээр Засгийн газрын бүтэц, бүрэлдэхүүн, түүнд өөрчлөлт оруулах тухай Ерөнхий сайдаас тавьсан саналыг түүнтэй зөвшилцөнө гэдгийг "Ерөнхийлөгчид бичгээр танилцуулан, түүний саналыг бичгээр авах гэж ойлгоно" хэмээн хуулиар нэг мөр болгон тайлбарласан.  Зөвшилцөнө гэдгийг зөвшөөрнө гэж ойлгох гээд байдаг. Зөвшилцөнө гэдэг нь бичгээр харилцан саналаа солилцоно гэсэн үг. Ерөнхийлөгч хуулийн төсөл дээр дан болон давхар дээлний асуудлыг 2016 оноос эхэлж хэрэгжүүлэхээр байсан.  Үүнийг АН-ын бүлгийн гишүүд болон Засгийн Засгийн гишүүд дэмжиж байгаа. Тиймээс бид өнөөдөр хүчин төгөлдөр үйлчилж байгаа хуулийн дагуу өргөн мэдүүлж байна.

6

ҮХАА-н сайдад нэр дэвшигч Ш.Түвдэндорж:

-Үндсэн хуулинд намын тухай асуудал цөөхөн заагдсан байдаг. Сонгуульд оролцох, Засгийн газар байгуулахад л намын асуудал бий. Тиймээс бид улс төрийн нам байгуулан сонгуульд оролцож, намынхаа улс төрийн шийдвэрийг олонх нь дагадаг. Энэ үүднээс намын шийдвэрийг дагана. Засгийн газрын гишүүнийг УИХ-ын гишүүн хавсарч гүйцэтгэж болохгүй гэж намын шийдвэр гаргахад түүнийг дагахад бэлэн байна. Парламентын хувьд сонгодог утгаар нь олон зүйлийг ярьж болно.  Өнөөдрийн тухайд хуулиа дагаж сахиж явна.

5

УИХ-ын гишүүн А.Тлейхан:

-Ш.Түвдэндорж гишүүний улс төрийн мэдлэг, туршлагыг хүндэтгэж байна. Харин зарчмын хувьд  Ерөнхийлөгчөөс өгч байгаа саналыг яагаад хүлээж авахгүй байгаа юм бэ?

6

ЗХЭГ-ын дарга Ч.Сайханбилэг:

-Өнөөдөр шинэ Засгийн газар байгуулах гээд бүтэц ярьж байгаа үед энэ асуудал сөхөгдсөн бол  саналыг харгалзан үзэх боломжтой байсан байх. Харин нэг сайдыг томилохоор асуудал хэлэлцэж байгаа тохиолдолд өөрөөр хандах болов уу. Өнөөдөр Засгийн газрын танхимд нэг хоёр гишүүн нь дан дээлтэй байх нь зарчмын том асуудал гарахгүй. Ерөнхийдөө бид шинэ Засгийн газрын бүтэц бүрэлдэхүүн байгуулагдах үед ярилцах хэрэгтэй. Цаг тухайд нь шийдээд явъя. ҮХАА-н сайдад яагаад Ш.Түвдэндорж гишүүнийг дэвшүүлсэн бэ гэж байна. Энэ салбар маш хариуцлагатай салбар. Энэ салбарын бодлогыг аваад явчих шилдэг боловсон хүчний нэгийг АН дэвшүүлж байна.

6

УИХ-ын гишүүн Я.Содбаатар:

-Үйлдвэр, хөдөө аж ахуйн салбар бол Монголын том салбаруудын нэг. Ялангуяа эдийн засгийн хүнд байдлаас авч гарахын тулд энэ салбарт томоохон бодлого боловсруулж ажиллах хэрэгтэй. Мал аж ахуйн салбарт эргэлт хийсэн салбарыг өмнөх парламент баталсан. "Монгол мал" хөтөлбөрийг үргэлжлүүлэн хэлэлцүүлэхэд юуг анхаарч ажиллаж байна вэ? Газар тариалангийн салбарт ямар зорилт дэвшүүлэх вэ?

6

ҮХАА-н сайдад нэр дэвшигч Ш.Түвдэндорж:

-"Мал төрийн хамгаалалт байна" гэж Үндсэн хуулинд санамсаргүй орсон заалт биш. Мал аж ахуй бол манай чухал салбар гэж ойлгож байгаа. Мал аж ахуйг дэмжсэн бодлого аль ч төрийн үед сайн явах ёстой. "Монгол мал" хөтөлбөрийг цааш нь үргэлжлүүлэх тал дээр гишүүдтэй нэр дэвшсэн хугацаандаа сонирхсон. Би хуульзүйн салбарт ажиллаж байсан болохоор "Монгол мал" хөтөлбөрийн суурь системийн талаар мэдлэггүй байлаа. Ер нь шүлхий болон гоц халдварт өвчнөөс урьдчилан сэргийлэх вакцины асуудал маш чухал. Малын индексжүүлсэн даатгалын талаар УИХ-аар хэлэлцэж байна. Энэ хөтөлбөрүүдийг үргэлжлүүлэхээр чармайн ажиллана. Газар тариалан дээр улаанбуудайг дэмжсэн бодлого орхигдсон тал бий. Үүнээс болж 2010 онд хүрч байсан түвшнээс ухралт гарсан. Гаднаас буудай авсан. Тиймээс аль болох тариаланчдаа дэмжихийн тулд төр засгаас бодлого үргэлжлүүлэн явуулах ёстой. Энэ намар улаанбуудайгаар дотоод хэрэгцээгээ хангах байх гэж бодож байна. Шинэчлэлийн Засгийн газрын мөрийн хөтөлбөрт үйлдвэрлэлийн асуудал туссан байгаа. Сайншандын аж үйлдвэрийн паркийг байгуулах  ажил дээр шургуу ажиллана. Барилгын материалын, шингэн түлш гаргаж авах үйлдвэрлэл дээр анхаарч ажиллана.

6

УИХ-ын гишүүн Ц.Дашдорж:

-Давхар дээлийн асуудлыг Ш.Түвдэндоржтой холбож ярих нь учир дутагдалтай. Нам нь асуудлаа шийдээд оруулж ирж байна. Энэ салбарыг аваад явах бололцоотой гэж үзэж байна. Хөдөө аж  ахуйн салбарт анхаарч ажиллах хэрэгтэй. Хөдөө аж ахуйн салбар бол Монгол Улсын эдийн засгийн тулгын гурван чулууны нэг. Аж үйлдвэрийн паркийн хувьд цаасан дээр буулгасан ажил байна. Аж үйлдвэрийг хөгжүүлье гэж бодож байгаа бол энэ чиглэлд анхаарлаа хандуулж ажиллаарай.

6

Гишүүд ийн асуулт тавьж саналаа хэлсний дараагаар ҮХАА-н сайдад Ш.Түвдэндоржийг томилохыг дэмжих санал хураалт явуулсан юм. Байнгын хорооны гишүүдийн дийлэнх нь ҮХАА-н сайдад Ш.Түвдэндоржийг томилохыг дэмжив.

6

Н.Энх