Монгол инженерүүдийн ур ухаанаар бүтсэн троллейбус нийтэд үйлчлээд багагүй хугацаа өнгөрсөн билээ. Харин өчигдрөөс эхлэн “Эрдү” компанийн инженерүүдийн бүтээсэн автобус туршилтаа хийж эхэллээ. Үйлдвэрлэлээс гараад хоёр хонож буй  J800 маркийн автобусыг нэг сарын хугацаанд хийсэн байна. Тус компанийн Автобусны үйлдвэрийн ашиглалтын өмнөх захиргааны дарга Т.Наранбаатарын мэдээлснээр J800N загварын автобус нь импортоор оруулж ирдэг автобуснаас шатахуун зарцуулалт, хорт утаа ялгаруулалт багатай, газраас шат хүртэлх зай бага учир өндөр настан, хүүхэд үйлчлүүлэхэд тохиромжтой гэнэ. Мөн бууж суух хэсэгт байрлуулсан дэлгэцээр зорчигч автобусанд бүрэн суусан эсэхийг хянах боломжтой ажээ. “Эрдү” компани ирэх 3 дугаар сараас өөрийн үйлдвэрийн байрыг барьж эхлэх агаад жилд 100-120 автобус үйлдвэрлэх боломжтой юм байна. Монгол инженерүүдийн үйлдвэрлэсэн автобусыг  туршилтын замд гаргах ёслолд УИХ-ын дэд дарга, Монголын Төмөрлөг, машин үйлдвэрлэлийн үндэсний холбооны Ерөнхийлөгч Г.Батхүү, Нийслэлийн Засаг даргын орлогч Д.Ганболд, Цахилгаан тээвэр компанийн захирал, Монгол Улсын зөвлөх инженер, Төмөрлөг, машин үйлдвэрлэлийн үндэсний холбооны дэд ерөнхийлөгч Д.Жаргалсайхан нар оролцлоо.