Украины Ерөнхийлөгч Петр Порошенко зэвсэгт хүчний шинэ ерөнхий командлагчаар дэслэгч генерал Виктор Николаевич Муженког томилсон тухай “Vlasti.net” мэдээллээ. Тэрбээр албан тушаалаа хүлээн авсаны дараа Донецк, Луганск, Славянск Харьков хотод явуулж буй цэргийн ажиллагааг эрчимжүүлэхээ мэдэгдсэн байна.

Муженко “Украины зүүн хязгаарыг эзлээд буй салан тусгаарлагч нарыг бууж өгөх хүртэл цэрэг армийн ажиллагаагаа үргэлжүүлэхээ мэдэгдье. Зэвсэгт хүчин ард түмнээ хамгаалахын тулд бүхнийг хийх болно” гэж мэдэгджээ.

Ерөнхийлөгч Порошенко зэвсэгт хүчний шинэ ерөнхий командлагчийн тухай “Украины зэвсэгт хүчинг Виктор Николаевич Муженко сайн удирдана гэдэгт итгэлтэй. Би түүнээс их зүйлийг хүлээж буй” гэжээ. Порошенко зэвсэгт хүчний ерөнхий командлагчийн албыг давхар хашихаас татгалзсан шалтгаанаа тайлбарлаагүй байна.

Б.Дэлгэрцэцэг