Төрийн орон сууц корпораци /ТОСК/-иас өчигдөр “Буянт-Ухаа 1” хорооллын  талаар мэдээлэл хийсэн юм. “Буянт-Ухаа 1” хорооллын байранд орох эрхтэй болсон ч зээлийн асуудалд банк шийдвэртэй хариу өгөхгүй байгаа талаар иргэд шүүмжилж буй.  Мөн тус хороололд орон сууц худалдан авах иргэдийг өнгөрсөн тавдугаар сард сугалаагаар тодруулсан бөгөөд нийт 1540 иргэн азтан болсон юм. Гэвч тодорхой шалтгааны улмаас зарим азтанууд орон сууцнаасаа татгалзсан бөгөөд өнгөрсөн хугацаанд нийт 323 орон сууц буцаагдсан тул ТОСК-иас тэдгээр байруудад дахин сугалаа явуулахаар болсон аж. Дээрх асуудлуудаар Төрийн орон сууцны корпорацийн Ерөнхий захирал А.Гантулгатай ярилцсанаа хүргэж байна.  

as

-“Буянт-Ухаа 1” хорооллын байранд орох азтан болсон хичнээн иргэн байрандаа ороход бэлэн болоод байна вэ?

-“Буянт-Ухаа 1” хорооллоос орон сууц худалдан авахаар 9094 иргэн захиалга өгсөн. Үүнээс ТОСК-иас тавьсан шаардлагад 5935 иргэн тэнцэж, сугалаанд орох эрхээ авсан. Харин сугалаагаар 1540 иргэн байранд орон эрх хожсон. Сугалаагаар азтан болж байр авах эрхтэй болсон иргэдээс 1134  иргэн  байраа сонгож, 30 хувийн урьдчилгаагаа төлсөн. Үүнээс 83 иргэн банкнаасаа зээл аваад, байрандаа ороход бэлэн болсон. Сугалаагаар азтан болсон ч ар гэрийн гачигдал, гадаад явах зэрэг амьдралын янз бүрийн шаардлагаас үүдэн 323 байрны эзэн 30 хувиа буцаан авсан.

a

-Буцаагдсан 323 байрыг хэрхэн хуваарилах бол?  

-Буцаагдсан 323 байрыг ТОСК-ийн шаардлага хангасан ч сугалаанд аз  таараагүй иргэдийн дунд дахин сугалаа явуулна. Сугалааг энэ сарын 19-нд “Бөхийн өргөө”-нд өмнөх шигээ олон нийтэд нээлттэй ил тод байдлаар зохион байгуулна. 

a

- Өмнөх сугалаанаас үлдсэн 224 байр байгаа. Эдгээрийг хэрхэн хуваарилсан бэ?

-Засгийн газрын шийдвэрээр эдгээр 224 байрыг яамдуудад квотоор тараасан.

a

-“Буян-Ухаа 1” хорооллыг улсын комисс бүрэн хүлээж аваагүй байгаа гэх мэдээлэл байна?

-Энэ бол  жилийн дотор Монголын бүтээн байгуулалтын  корпорацитай хамтран босгосон маш том бүтээн байгуулалт. Иргэд зөвхөн орон сууц баригдсан гэсэн ойлголттой байгаа. Гэтэл “Буянт-Ухаа 1” хороолол нь инженерийн шугам сүлжээний шийдэлтэй, иж бүрэн шинэ цэвэрлэх байгууламжтай, цэвэр усны маш том нөөц бүхий хороолол. Одоогийн байдлаар бүх байшинг Улсын комисс 100 хувь хүлээгээд авсан. Мөн Засгийн газрын журман дээр 15 жилийн асуудал яригдсан байгаа. Гэтэл энэ нь Монгол банк, МИК, Санхүүгийн зохицуулах хорооны хуулийн заалтуудтай зөрчилдсөн. Үүнийг Засгийн газрын хуралдаанаар маш хурдтай шийдвэрлүүлсэн. Жишээлбэл, Дорж гэдэг хүн банкнаас зээл аваад банкны зээлээ төлж чадахгүй бол банк орон сууцыг нь хурааж аваад зарах эрхийг нь нээж өгөхөөр бид журманд өөрчлөлт оруулсан. Иргэдэд хоорондоо зарах асуудал үйлчлэхгүй.

a

-“Буян-Ухаа 1” хорооллын азтан болсон иргэдэд банкууд 8 хувийн зээл олгохгүй байгаа тухай мэдээлэл байна. Энэ талаар тодруулахгүй юу?

-Монголын ипотекийн корпораци буюу МИК-иас бүх банкуудад албан тоотоо хүргүүлсэн байгаа. Худалдаа хөгжлийн банкныхантай уулзсан. Тэд “Буян-Ухаа 1” хороолол Хан-Уул дүүрэгт байрладаг тул тус дүүрэгт байгаа 4 салбаруудаар иргэдэд зээл өгье гэж тохирсон. “Хаан банк”-ны Удирдлагын зөвлөл хуралдаж байна. “Голомт банк” зээлээ өгөөд эхэлсэн байна. Нэмж хэлэхэд банк бол ТОСК-иас тусдаа байгууллага. Бид зөвхөн хямд чанартай орон сууц л нийлүүлсэн. Иргэд банкны заасан журмынх нь дагуу материалаа бүрдүүлээд өгөх юм бол бүх банк 8 хувийн зээлээ өгч байгаа.

a

-Ахмад настан, хөгжлийн бэрхшээлтэй иргэд сугалаанд аз таарсан ч банкны шалгуурыг давах боломжгүй байгаа талаар яригдаж байна?

-Банкны шалгуурт тэнцэхгүй байж болох ч хамтран зээлдэгчтэйгээр зээл авах боломжтой гэдгийг журамд заасан байгаа.  Хамтран зээлдэгчээр ажил хийдэг үр хүүхдээ сонгосноор  зээлээ авсан ахмад настан, хөгжлийн бэрхшээлтэй иргэд цөөнгүй бий.

.

-“Буянт-УхааII” хорооллын барилгын ажлын явц ямар  байгаа вэ?

-“Буянт-УхааII” хорооллын 48 байр подвалын давхарын цутгалтаа хийгээд дууссан. Одоо нэг, хоёрдугаар давхрын  ажлаа хийж байгаа. Бид энэ оны 11 дүгээр сардаа багтаагаад 2000 гаруй айлын орон сууцыг ашиглалтад оруулах зорилготойгоор ажиллаж байна. Цахилгаан, цэвэр ус гээд хүндрэлтэй асуудлууд байгаа ч дор дор нь шийдээд явж байна.

й

- “Буянт-УхааII” хорооллын метр квадратын үнэ хэд байх вэ. Инфляцийн өсөлтийг дагаад нэмэгдэх үү. Энэ талаар урьдчилсан тооцоо гарсан уу?

-Үнэд өөрчлөлт орохгүй. Өмнө “Буянт-Ухаа1”хороолол шиг 1 сая 280 мянгаар зарагдана. ТОСК иргэддээ хямд үнэтэй орон сууц барьж өгөхөөр л ажиллаж байгаа шүү дээ.

й

П.Наран