Монгол Улсын Ерөнхий сайдын ахлах  зөвлөх Л.Гансүх “Нүүрс” хөтөлбөрөөс олон тэрбум төгрөг завшсан хэргээр Төв аймгийн цагдан хорих байранд хоёр сарын хугацаатай саатуулагдаад байгаа билээ. Түүнийг ийн цагдан хорьсонтой холбогдуулан Монгол Улсын Ерөнхий сайд Н.Алтанхуяг, Хуульзүйн сайд Х.Тэмүүжин нар “эргэж очсон” талаарх бичлэг цахим сайтуудад тавигдсан. Үүнтэй холбогдуулан МАН-ын Ерөнхий нарийн бичгийн дарга Ж.Мөнхбат мэдээлэл хийлээ. Тэрбээр мэдээлэлдээ:

5

-Өнгөрсөн сарын 31-нд Монгол Улсын Ерөнхий сайд Н.Алтанхуяг Хуульзүйн сайд Х.Тэмүүжингийн хамт Төв аймгийн цагдан хорих байранд саатуулагдаад байгаа Ерөнхий сайдын ахлах зөвлөх Л.Гансүх дээр хууль зөрчин очсон. АТГ-ын комиссар н.Золжаргалын гаргасан шийдвэрийг үл хүндэтгээд Монгол Улсын Ерөнхий сайд нь хууль зөрчин яваад очлоо. Монгол Улсын нутаг дэвсгэр дээр хуулийг биелүүлэх, гардан хэрэгжүүлэх ажлыг Засгийн газар, түүнийг тэргүүлж байгаа Ерөнхий сайд нь хүлээдэг. Энэ утгаараа Монгол Улсад хууль хэрэгжүүлэх хүн өөрөө хуулиа хэрэгжүүлсэнгүй. Хууль зөрчсөн ноцтой үйлдэл боллоо. Энэ нь Хуульзүйн сайдын журам, ЭБШ хууль буюу хэрэг мөрдөлт, шүүн таслах ажиллагаанд санаатайгаар  саад учруулсан заалтыг зөрчиж байгаа. Үндсэн хуулийн зарим заалт мөн зөрчигдсөн. Ерөнхий сайд хуулийг ийн зөрчиж байгаад МАН-ын зүгээс хариуцлага тооцох ёстой гэж үзэж байна. Дээр нь Ерөнхий сайд ахлах зөвлөх дээрээ Хуульзүйн сайдыг дагуулан яаран очсон үйлдэл бол намын гишүүнээ эргэж очсон бус үйлдсэн хэргийг нь хаацайлж, үгсэн тохиролцох гэсэн үйлдэл юм гэж бид дүгнэж байгаа юм. Хуулийг хэрэгжүүлэх, дээдлэх ёстой Ерөнхий сайд нь өөрөө хууль зөрчөөд явж байгаа нь ардчиллын амин сүнс болсон хүн бүхэн тэгш эрхтэй байх зарчмыг алдагдуулж байна. Тиймээс МАН  УИХ-ын дарга З.Энхболдод мэдэгдэл хүргүүлж байна. Төрийн хуулийг биелүүлэх ажлыг УИХ-ын өмнө хариуцах ёстой Ерөнхий сайд, Хуульзүйн сайд хоёрт УИХ-ын ээлжит бус чуулган зарлаж, хууль зөрчсөн үйлдэлд нь улс төрийн хариуцлага тооцохыг уг мэдэгдэлдээ шаардсан. Хууль зөрчсөнөөс гадна ёс зүйн хариуцлага байх ёстой. Бусад улс оронд хууль зөрчсөн тохиолдолд өөрсдөө огцордог жишиг байдаг гэлээ.

6

МАН-ын Ерөнхий нарийн бичгийн дарга Ж.Мөнхбат мэдээлэл хийснийхээ дараа сэтгүүлчдийн сонирхсон асуултад хариулсан юм.

6

-Мэдэгдлийн хариуг хэд хоногийн дотор өгдөг бол? Энэ хугацааг ээлжит бус чуулганыг зарлан хуралдуулж амжих уу?

-УИХ-ын дарга амарч байгаа. УИХ-ын дарга амарч байгаа учраас МАН-ын дарга, УИХ-ын дэд дарга М.Энхболд орлож байна. УИХ-ын дэд дарга М.Энхболд УИХ-ын даргыг наймдугаар сарын 5-ныг хүртэл орлох юм билээ. Үүний дараагаар УИХ-ын дарга ажилдаа орно. Тиймээс бид наймдугаар сарын 5-наас хойш мэдэгдлээ өгнө. Мэдэгдэл өгсний дараагаар ажлын долоо хоногт багтаан мэдэгдлийн хариуг өгөх юм.

6

Н.Энх