Дэлхийд эхний аравт орохуйц буюу 170 гаруй тэрбум тонн нүүрсний нөөцтэй Монгол орон нүүрсээ экспорлоё гэхээр тээврийн зардал нь борлуулах өртөгөөсөө давчихдаг. Боловсруулах үйлдвэр барих хөрөнгө мөнгө гаднаас зээлье гэхээр Засгийн газрын зээлжих эрх хаана нь ч хүрдэггүй гээд олон асуудал гардаг. Энэ талаар холбогдох албаныхан ч олон жил ярьж ирсэн бол хувийн хэвшлийн байгууллага болох “Чингис Энержи” групп энэ чиглэлд ахиц гаргажээ.

й

Тодруулбал, тэд монголынхоо хүрэн нүүрсний ордуудад түшиглэн “Нүүрс-хими болон түлш-эрчим хүчний иж бүрэн цогцолбор” байгуулахаар ажиллаж эхэлсэн гэнэ.  Олон жилийн  судалгаа, тооцоо хийж, БНХАУ, ОХУ болон олон улсын хөрөнгө оруулалт, техник-технологийн компаниудтай хамтран ажилласан аж. Үр дүнд нь Монгол Улсаа эрчимтэй хөгжүүлж монголчуудынхаа амьдралын түвшинг дэлхийн тэргүүлэгч орнуудын хэмжээнд хүргэх чухал гэрээг үзэглэжээ.

w

Энэхүү гэрээний дагуу 2016 он гэхэд жилд хоёр тэрбум шоо метр нүүрсний нийлэгжүүлсэн хийн загвар үйлдвэр ашиглалтад орох юм байна. Цаашдаа жилд нийт 100 тэрбум шоо метр нүүрсний нийлэгжүүлсэн хий үйлдвэрлэх хүчин чадалтай үйлдвэр, химийн бүтээгдэхүүний үйлдвэр, нүүрс шингэрүүлэх үйлдвэр, хий дамжуулах хоолой бий болгохыг зорьж байгаа аж.

й

Түүнчлэн нүүрсний нийлэгжүүлсэн хийгээр тэжээгдэх цахилгаан станц зэргээс бүрдэх нүүрс-хими болон түлш-эрчим хүчний иж бүрэн цогцолборуудыг 2015-2020, 2020-2025 онуудад хоёр үе шаттайгаар байгуулах юм байна. Мөн ийм аж үйлдвэрийн цогцолборт нийцэх нийгэм-ахуйн бүхий л нөхцлийг цогцоор нь бүрдүүлсэн орчин үеийн шинэ хотууд буюу хөгжлийн шинэ төвүүд манай Төв, Баруун, Зүүн бүсэд бий болох юм байна.

ы

Энэ төслийн нийт хөрөнгө оруулалт нь 100 тэрбум ам.доллар байхаар тооцсон гэнэ. Уг төслийн хүрээнд олон улсын гэрээ хэлэлцээр хийж эхэлснээр манай улсын компаниуд бүтээн байгуулалтын  ажилд оролцох боломж нээгдэж 200 мянга гаруй ажлын байр бий болох юм байна. Түүнчлэн экспортын орлого жилд 57 тэрбум ам.доллараар нэмэгдэж 1 хүнд ногдох ДНБ 50-70 мянган ам.доллар болох эдийн засгийн үр өгөөж харагдаж байгаа ажээ.

й

П.Наран