“Фокус метал майнинг” ХХК-ний “Булган аймгийн Бүрэгхангай сумын нутаг дахь Худагбайшинтын төмрийн хүдрийн ордын нойтон баяжуулах үйлдвэр нээлтээ хийлээ. Үйлдвэрийн нээлтийн үйл ажиллгаанд Уул уурхайн сайд Д.Ганхуяг, УИХ-ын БОХХААБХ-ны дарга Г.Баярсайхан, ХЗБХ-ны дарга Б.Ганбат, ҮХХА дэд сайд Б.Цогтгэрэл болон албаны бусад хүмүүс оролцлоо.

бө

Уул уурхайн сайд Д.Ганхуяг Худагбайшинтын төмрийн уурхайн нойтон баяжуулахын үйлдвэрийн нээлтэд оролцох үеэрээ хэлсэн үгэндээ “Анхдагчдын өлгий нутаг Булган аймагт Монгол Улсын анхны төмрийн хүдрийн нойтон баяжуулах үйлдвэрийн эхний ээлжийг хүлээн авлаа. Сүүлийн жилүүдэд төмрийн хүдрийн олборлолт болон экспорт өсөн нэмэгдэж байгаа. Баяжмалын хэмжээ ч дагаад өсөж байгаа. Иймд төмөрлөгийн салбараа тодорхой үе шаттайгаар хөгжүүлэх шаардлагатай байна. Эхний ээлжинд хүдрээ олборлоно, баяжуулна. Улмаар техникийн хүчин чадлаа сайжруулна. Ингэснээр металлургийн үйлдвэрлэл барихад шилжих алхам хийгдэх юм. Өнгөрсөн 10 жилийн хугацаанд металлургийн өмнөх үе шатыг түлхүү анхаарч байсан. Харин одоо металлургийн салбарыг хөгжүүлэх цаг  нь болсон. “Фокус Метал Майнинг” ХХК нь Худагбайшинтын төмрийн хүдрийн ордыг түшиглэн нойтон баяжуулах үйлдвэрийн эхний ээлжийн шугамыг нээж ашиглалтанд оруулж байгаа нь Монгол Улсын төмөрлөгийн салбарын хөгжилд шинэ хуудас нээж байгаа юм.  Тус компани цаашдаа тус үйлдвэрлэлийн хүчин чадлыг нэмэгдүүлж, төмрийн хүдрийн боловсруулалтын түвшинг хайлуулах үйлдвэр хүртэл дээшлүүлнэ гэдэгт найдаж байна” гэлээ.

бө

Худагбайшинт уурхай 2012-2014 онуудад 20 сая ам.долларын хөрөнгө оруулалтаар нойтон баяжуулах үйлдвэрийн барилга угсралтын ажил бүрэн гүйцэтгэж туршилт тохируулгын ажил хийж гүйцэтгэсэн байна. Энэхүү үйлдвэр ашиглалтанд орсноор 100 гаруй ажлын байр шинээр бий болж байгаа юм. Түүнчлэн тус үйлдвэр нь жилд 600 мянган тн хүдэр олборлож, 300 мянган тонн баяжмал гаргана. Нойтон баяжуулах үйлдвэрийг ашиглалтад оруулснаар 5 жилийн хугацаанд 1,9  сая тн нойтон баяжмал, 69 мян.тн хуурай баяжмал борлуулж 228,2 сая ам.долларын ашигтай ажиллана гэсэн тооцоо гаргаад байгаа аж.

бө

66 хувийн агуулгатай төмрийн баяжмал нь хуурай аргаар боловсруулсан баяжмалаас агуулгын хувьд 20 хувиар илүү төдийгүй үнийн хувьд 40-60 ам.доллараар илүү үнээр борлуулагддаг байна. Тус үйлдвэр нь бүтээгдэхүүнээ завсарын зуучлагчаар дамжуулахгүйгээр гангын үйлдвэрт шууд экспортлох хэлэлцээр хийгээд байгаа аж.

бө

Н.Нягт