Шангри-Ла зочид буудлын барилгад 12.45 цагийн үед гал гарч, 14.40 цагт галыг бүрэн унтраалаа. Уг барилга 80 хувийн гүйцэтгэлтэй байсан бөгөөд ирэх 12 дугаар сард хүлээлгэн өгөхөөр ажиллаж байсан юм байна. Барилгын ажил 80 хувийн гүйцэтгэлтэй байсан ч дотор тавилга, хивс дрожоо оруулсан байжээ. Үүнийг мэргэжлийн хяналт болон онцгойгийн байцаагч нар шалгах юм байна.  Галыг бүрэн унтраасны дараа ОБЕГ-ын дарга Т.Дуламдорж сэтгүүлчдэд мэдээлэл өглөө.

а

-Яг одоогийн нөхцөл байдлын талаар мэдээлэл өгөхгүй юу?

-Дуудлага ирснээс таван минутын дараа манай аравдугаар ангийн эхний салаа 12.55  цагт ирсэн. 22, 23 дугаар давхар галд автсан учраас манай даралт хүрэхгүй, ажиллахад хүндрэлтэй байлаа. Барилгын гадна фасад маш ихээр шатсан. Фасад нь дотроо шилэн хөвөнтэй чийгнээс тусгаарлах резинэн материалтай юм байна. Энэ материалыг  галд тэсвэртэй эсэхийг манай Гамшиг судлалын хүрээлэнд шалгуулах ёстой. Энд манай гурван ангийн 6 машин, 40-өөд албан хаагч ажиллалаа.

а

-Гэмтэж, бэртсэн хүн байгаа юу?

-Гэмтэж, бэртсэн хүн байхгүй. Нийслэлийн Аврах ангийн эрэн хайх, аврах салбарынхан шуурхай ажиллаж, дээврийн хэсэгт байсан 23 хүнийг дотоод шатаар буулгаж, аюулгүй болгосон.

а

-Гал юунаас болж гарсан юм бол?

-Одоогоор тодорхой хэлэх боломжгүй. Манай шинжээчид орсон байгаа. Цахилгаанаас гарсан байх магадлалтай. Галын шалтгааны эхний дүгнэлт  ажлын тав хоногт багтан гарна.

а

-Барилгын дээд давхруудад ус цацах боломжгүй харагдаад байсан. Онцгой байдлын хүчин чадал дутагдсан гэж үзэж болох уу?

- Улаанбаатар хотод үүрэг гүйцэтгэж байгаа галын машины шатны урт нь 35 метр. Дээд тал нь 9 давхарт хүрнэ гэсэн үг. Есөн давхраас дээших үйл ажиллагааг хүний хүчээр зохион байгуулна. Тиймээс бид өндөр шилэн барилга дээрх аврах ажиллагааг нисдэг тэргээр гүйцэтгэх саналыг Ерөнхий сайд, Шадар сайдад тавьж байгаа. Өндөр барилга дээрх аврах ажиллагааг нисдэг тэргээр гүйцэтгэхээс өөр аргагүйг өнөөдрийн гал харууллаа.

ө

В.Бат