УИХ дахь АН-ын бүлэг өнөөдөр хуралдаж, дараа нь сэтгүүлчдэд мэдээлэл хийлээ. Намрын чуулган эхэлснээс хойш Ардчилсан намын бүлэг хоёр удаа хуралдсан бөгөөд  эдийн засгийн идэвхижлийг нэмэгдүүлэх “ЭЗЭН-100” хөтөлбөрийн биелэлтийн талаарх Ерөнхий сайд болон Засгийн газрын гишүүдийн дүгнэлт, Засгийн газраас өргөн барьсан бүтцийн асуудлыг хэлэлцсэн аж.

bh

Энэ талаар УИХ дахь АН-ын бүлгийн дарга Д.Эрдэнэбат хэлэхдээ “Анх ЭЗЭН-100” хөтөлбөрийг батлахдаа эдийн засгийг идэвхжлийг нэмэгдүүлэх, эдийн засагт таатай болгох эрх зүйн орчин бүрдүүлэх, бүтээн байгуулалтын нэгэнт эхэлсэн ажлуудаа дуусгах, валютын ханшийг тогтворжуулах зэрэг зорилтууд тавьсан. Хөтөлбөрийн хүрээнд дээрх зорилтуудаа хангалттай биелүүлсэн гэж үзэж байна. Тухайлбал экспорт жигдэрсэн, нүүрс олборлолт өссөн, валютын нөөц нэмэгдэж байгаа, Тавантолгой,  Оюутолгойн далд уурхайн ажил жигдэрч байгаа зэрэг олон үр дүн харагдаж байна. Тиймээс АН-ын бүлгээс Засгийн газрыг эдийн засгийг эрчимжүүлэх хөтөлбөрөө хангалттай биелүүлсэн гэж үзэж байна. Гэхдээ энэ үр дүнг цөөнхийн бүлэг “ЭЗЭН-100” хөтөлбөр огт үр дүнгээ өгөөгүй хэмээн дүгнэж байна. Зарим улс төрчид “ЭЗЭН-100” хөтөлбөрөөр дамжуулаад Засгийн газарт хариуцлага тооцоё, бүтцийн асуудлаар дамжуулаад Ерөнхий сайдыг огцруулья гэсэн хандлага гаргаж байна” гэлээ.

bh

АН-ын бүлэг өнгөрсөн хавар анх “ЭЗЭН-100” хөтөлбөрийг эхлэх үед “хэрэв хөтөлбөрийн хэрэгжилт хангалтгүй байна гэж үзвэл АН өөрсдөө Засгийн газарт хариуцлага тооцно” гэдгээ хэлж байсан. Магадгүй энэ хүрээнд Ерөнхий сайд Засгийн газарт бүтцийн өөрчлөлт хийж байгаа байх гэдгийг АН-ын бүлгийн дарга хэлсэн юм. Яамдыг нэгтгэсэн асуудлаар мэдээлэхдээ, Эдийн засгийн хөгжлийн яам, Сангийн яам хоёр тусдаа төсөвтэй байна. Эдийн засгийн хөжлийн яам нь  бодлого боловсруулахгүй, бондын мөнгийг л зарцуулдаг байгууллага болж хувирлаа гэсэн шүүмж гарсан учраас хоёр яамыг нэгтгэсэн. Харин томоохон төсөл хэрэгжүүлэх бүрт, тухайлбал нэг уул уурхайн ажил эхлүүлэхэд эрчим хүчийг нь заавал тусдаа шийдэх хэрэг гардаг зэрэг бүтэцтэй холбоотой шалтгаан их байсан учраас Эрчим хүч, Уул уурхайн яамыг нэгтгэсэн гэж ойлгож байна. Мөн Соёл, спорт аялал жуулчлалын яамыг бие даан цааш нь ажиллуулах шаардлага бий. Гурван сая хүн амтай, өргөн уудам нутагтай улсын хувьд өв соёлоо хамгаалах бодлогын яамтай байх ёстой. Эцэст нь бүтцийн өөрчлөлтийг УИХ-аас баталсны дараа хэнийг сайдаар томилохоо бүлгээрээ, УИХ-аараа хэлэлцэж шийдвэрлэнэ гэсэн шийдэлд хүрсэн. Одоохондоо нэг ч сайдын нэрийг цохож хэлэх боломжгүй байна  гэээ.

Энэхүү мэдээллийн дараа тэрбээр сэтгүүлчдийн сонирхсон асуултад хариулт өгсөн юм.

bh

-Шинээр томилогдох сайд нарыг хэрхэн сонгох вэ. “Давхар дээл”-тэй сайд нарыг томилж болохгүй, мэргэжлийн хүнээр яамдыг удирдуулах ёстой гэж Монгол Улсын Ерөнхийлөгч өөрийн байр сууриа илэрхийлээд байгаа?

-Манай улс ардчилсан орон. Тийм учраас бүх зүйл хуулийнхаа хүрээнд явна. Өнөөдрийн үйлчилж байгаа хуулийн хүрээнд шинээр томилогдох сайд нарыг санал болгоно байх. Дан дээл, давхар дээлийн тухайд их олон ярилаа. Монгол Улс өөрийн хуультай орон. Өнөөдрийн мөрдөгдөж байгаа хуулийн хүрээнд шийдэгдээд явна гэж ойлгож байгаа. Ардчилсан орон хуулиа мөрдөхгүй бол хүн болгоны хэлсэнийг хууль болгох юм бол ямар орон болж хувирах вэ гэдгийг хаа, хаанаа бодох ёстой.

bh

-Ардчилсан нам Засгийн газрыг байгуулахдаа МАХН-тай дөрвөн жилийн хугацаанд хамтарч ажиллах гэрээг хийсэн. Гэрээнд туссанаар “Шударга ёс” эвслээс дөрвөн сайд Засгийн газрын бүтцэд багтдаг. Яамд нэгдсэнээр энэ асуудал хэрхэн шийдвэрлэгдэх бол?

-Хоёр намын хооронд хийгдсэн гэрээ байгаа. Засаглалын хуваарилалтыг дурдсан зүйл заалт байж байгаа. Энэ зүйл заалт хөндөгдөхгүй гэдгийг Ерөнхий сайд өөрөө нотолсон. Тэгэхдээ Засгийн газрын бүтцийн тоо хэмжээ өөрчлөгдөж байгаа, хэн нэг хувь сайдын тухай  асуудал биш гэдгийг ойлголцсон гэж бодож байна.

nj

П.Наран