Өмнөд Судан улсад НҮБ-ын мандаттай "UNMISS"  энхийг сахиулах ажиллагаа 2011 оноос хойш үргэлжилж байгаа бөгөөд энэ онд НҮБ-ын Аюулгүй байдлын зөвлөлийн тогтоолооор UNMISS ажиллагааг өргөжүүлж, үүрэг гүйцэтгэх цэргийн тоо 6500 байсныг 12500 болгосон байна. Уг тогтоолын дагуу БНХАУ, Гана, Балба, Этиоп улсууд тус бүр 850 хүний бүрэлдэхүүнтэй мотобуудлагын батальоныг Өмнөд Судан улс руу нэмж илгээгээд байгаа аж. Хойд командлалын хариуцлагын бүст Монгол, Гана, Энэтхэг, Руанда улсын мотобуудлагын батальонууд, Этиоп Улсын мотобуудлагын рот болон дэмжлэгийн салбарууд, нийт 4200 гаруй албан хаагч үүрэг гүйцэтгэх юм. Уг бүс нутагт зэвсэгт мөргөлдөөн их давтамжтай гарч байгаа бөгөөд гэр орноосоо дүрвэгсэд, хүмүүнлэгийн ажиллагаа илүү шаардагддаг зэрэг онцлогтой гэнэ.

a

UNMISS ажиллагааны цэргийн хүчийг бүсийн командлалд хувиарлан зохион байгуулсан бөгөөд Хойд бүсийн олон улсын хүчний командлагчаар БХЯ-ны Стратегийн бодлого, төлөвлөлтийн газрын дарга, бригадын генерал Д.Баярсайханыг томилох шийдвэрийг НҮБ-ын Энхийг сахиулах ажиллагааны газраас есдүгээр сарын 26-ны өдөр гаргасан байна. Энэхүү шийдвэрийн дагуу НҮБ-ын Хойд бүсийн олон улсын хүчний командлагчаар БХЯ-ны Стратегийн бодлого, төлөвлөлтийн газрын дарга, бригадын генерал Д.Баярсайханыг үдэх ёслолын ажиллагаа өнөөдөр Батлан хамгаалах яаманд боллоо.

a

Батлан хамгаалах яамны төрийн нарийн бичгийн дарга, хошууч генерал З.Болдбаатар

Монгол Улсын Батлан хамгаалах салбар, зэвсэгт хүчний хувьд тэмдэглэлт үйл явдал тохиож байна. Монгол Улсын зэвсэгт хүчний бие бүрэлдэхүүний төлөөлөл болсон генерал хүн Олон Улсын энхийг сахиулах ажиллагаанд бүсийн командлагчаар томилогдож явахаар болоод байна. Манай энхийг сахиулагчид Өмнөд Судан улсад үүрэг гүйцэтгэж байгаа. НҮБ-аас Судан улсад үүрэг гүйцэтгэж байгаа гадаад улсуудын цэргийн алба хаагчдын тоо мөн командлалын тоог нэмэгдүүлсэн. Манай улсын зэвсэгт хүчинд урилга ирсэн. Уг урилгын дагуу манай зэвсэгт хүчний генералууд шалгалт өгч, холбогдох ярилцлаганд орж тэдний тавьсан шаардлага стандартыг биелүүлж чадлаа гэж харж байна. Цаашлаад манай улсын офицерууд олон улсын энхийг сахиулах ажиллагааны удирдах албан тушаалд ажиллах боломж бий болж байна. 

a

Хойд бүсийн командлагч Д.Баярсайхан

a

-Хойд бүсийн командлагч болохын тулд ямар, ямар шалгуур байдаг вэ?

-Хойд бүсийн командлагч гэдэг бол дор хаяж дөрвөн батальон командлах чадвартай офицер буюу бригадын захирагч байх ёстой гэсэн үг. Миний хувьд  Энэтхэг, Этиоп, Гана зэрэг улсуудын батальоныг захирна. Шалгуур үзүүлэлтийн хувьд хэлний мэдлэг сайтай байх шаардлагатай. Дөрвөн сектор дээр найман хүн өрсөлдөөд шалгарсан. 

a

-Таны очих бүс нутагт цагийн байдал ямар байгаа вэ?

-Миний очих гэж байгаа сектор нилээн төвөгтэй юм шиг байна. Цагийн байдал хүнд, Өмнөд Суданы нефть олборлодог талбай нь тухайн бүс нутагт байдаг юм байна. Мөн иргэний дайны шинжтэй болсон асуудал дээр 10.000-аад хүн нас барж, сая гаруй хүн гэр орноосоо дүрвэсэн байгаа гэсэн. Өлсгөлөн болоод халдварт өвчин газар авах шинжтэй болчихсон байгаа. 

a

-Сөргөлдөгч талуудын байдал ямар байгаа бол?

-Удахгүй тэнд борооны улирал нь болох гэж байгаа юм байна. Бороо их орохоор дэд бүтэцгүй болоод гэр орноосоо гардаг хүн байхгүй болдог юм шиг байна. Борооны улирал дууссаны дараа буюу энэ сарын сүүлээр Засгийн газрын цэрэг нь сөрөг хүчний эсрэг том арга хэмжээ авна гэсэн  албан бус мэдээлэл байгаа.

a

-Таны ямар хугацаанд үүрэг гүйцэтгэх вэ?

-Би нэг жилийн хугацаанд үүрэг гүйцэтгэнэ.

a

П.Наран