УИХ дахь МАН-ын бүлгийн хуралдаанаар цаг үеийн асуудлыг хэлэлцсэн байна.  Бүлгийн хуралдаанар Монголбанкны ерөнхийлөгч Н.Золжаргалыг урьж, төрийн мөнгөний бодлого ямар байгаа, валютын нөөц яагаад хасах баланс руу орсон талаар тодорхой мэдээлэл авахыг хүссэн ч “өвчтэй” гэсэн шалтгаанаар ирээгүй аж.

бө

УИХ дахь МАН-ын бүлгийн хуралдаанаар ирэх оны төсвийн төслийг хэлэлцжээ.  Ирэх оны төсвийн төслийг Засгийн газар буцаан татаж дахин өргөн барьсан ч үнэхээр сул, иргэд рүүгээ чиглэсэн дорвитой дэмжлэг байхгүй төсөв болсныг бүлгийн гишүүд онцолсон байна.  Ялангуяа цалин тэтгэврийг 30 хувиар нэмэгдүүлэх, таван төсөвтэй болсныг нэг болгох шаардлага хангагдсангүй гэж МАН-ын бүлэг үзэж байна. Мөн ДНБ-д эзлэх өрийн босгыг 90 хувьд хүргэхийг дэмжихгүй, хөрөнгө оруулалт нь царцаагдсан 328 төсөл, арга хэмжээний санхүүжилтийг шийдэх ёстой гэсэн байр суурьтай байна. Орон нутгийн эрх мэдлийг нэмэгдүүлэх нэрээр ирэх онд хөрөнгө оруулалтыг задаргаагүй, санхүүжүүлэх эх үүсвэр нь тодорхойгүй ерөнхий дүнгээр нь төсөвт тусгажээ. Тиймээс объект нэг бүрийг мөнгө санхүүтэй нь төсөвт тусгаж баталж өгөх ёстой гэж МАН-ын бүлэг үзэж байна.

бө

Төсвийн төсөлд урсгал зардлыг 11.5 хувь буюу 807.6 тэрбум төгрөгөөр төсвөө нэмэгдүүлэхээр оруулж иржээ. Эдийн засаг хямарсан үед тансаг хэрэглээгээ аль болохоор бууруулах ёстой. Тухайлбал, зардлыг сайд тус бүр дээр 50 хувиар бууруулах ёстой гэж үзлээ. Мөн эд хогшил, тавилга хэрэгслийн зардлыг хасах, томилолт, зочны зардлыг багасгах зэргээр нийтдээ 530 тэрбум төгрөгийн зардлыг бууруулах боломжтой гэж үзэж Төсвийн байнгын хороонд саналаа хүргүүлнэ гэж бүлгийн дэд дарга Д.Оюунхорол мэдээллээ.

бө

ТЕГ нь ажлын бус цагаар, прокурорын байгууллагын зөвшөөрөлгүй сэтгүүлчдийг байцааж, хуулиар тусгайлан өөрт нь харьяалуулаагүй асуудлаар улстөржиж байна гэж МАН-ын бүлэг үзжээ. "Улс төрийн намын байранд ямар ч зөвшөөрөлгүй нэвтэрч, эд хогшил хураан авч, сэтгүүлчид, иргэд, жиргээчид, УИХ-ын гишүүний туслахыг дуудаж байцаасан үйлдлүүд гарлаа. ТЕГ нь Ерөнхий сайдын хувийн мөрдөх товчоо шиг ажиллаж байна гэсэн зарим хүмүүсийн шүүмжлэлд анхаарлаа хандуулах ёстой" гэж МАН-ын бүлгийн дэд дарга онцолсон. Иймд ТЕГ-ыг хуулийн дагуу ажиллуулах талаар УИХ-ын дарга болон Тусгай хяналтын дэд хороонд шаардлага тавихаар болжээ.

өа

Н.Энх