УИХ-ын чуулганы нэгдсэн хуралдаанаар Төсвийн тухай хуульд өөрчлөлт оруулж байгаатай холбогдуулан дагалдах Боловсролын тухай, Хөдөлмөр эрхлэлтийг дэмжих тухай, Бүсчилсэн хөгжлийн удирдлага зохицуулалтын тухай зэрэг хуулиудад орж буй өөрчлөлтийн талаар хэлэлцлээ. Таван хуулийн төсөл, хоёр тогтоолын төсөлтэй холбоотой асуудал ярьж байгааг УИХ-ын дарга З.Энхболд гишүүддээ анхааруулж байв.

бө

Учир нь гишүүд хэлэлцэж байгаа асуудлаас хальж ирэх оны төсвийн төсөлтэй холбоотойгоор Засгийн газрын гишүүдээс асуулт асууж байсан юм. Гишүүд ирэх оны төсөв, мөнгөний бодлого хийгээд эдийн засгийн асуудалд илүүтэй анхаарч, асуулт ч тэр чиглэлд явж байлаа. Гишүүд асуултуудаа ихэвчлэн  Ерөнхий сайдад хандан тавьж байсан юм.

өа

Монгол Улсын Ерөнхий сайд Н.Алтанхуяг “Бидэнд болж байгаа ч юм байна, болохгүй ч зүйл байна. Бидэнд төсвийн орлогын бэрхшээл, хүндрэл байгаа. Би байгаа зүйлийг байгаагаар нь хэлж байна. Би сайхан байгаа гэж хэлээгүй. Хямрал болоогүй юм шиг бүтээн байгуулалт бондын мөнгөөр босч байна. Улаанбаатар хот 250 тэрбум төгрөгийг өөрөө олоод өөрөө зарцуулдаг. Жижиг, сажиг зүйлээр хөөцөлдөөд яах вэ, том дүр зургаа харъя гэж байв. УИХ-ын гишүүн Н.Энхболд “Хувьчлалын орлогын асуудал ярихаар тойруулаад байна. Тодорхой хариулаарай, Ерөнхий сайд аа. Орон нутгийн удирдлагад ажиллаж байсан хүмүүс Төсвийн санхүүжилтийн хууль гаргаад асуудлыг жигдэлсэн. Гэтэл өнөөдөр төсвийн мөнгө байтугай орон нутгийнхаа мөнгийг зарцуулж чадахгүй байна гэнэ. Энэ оруулж ирсэн хуулиар асуудал жигдрэх үү? Хуулиудынхаа үзэл баримтлалыг хэлэхгүй юу? гэсэнд Ерөнхий сайд “Сумын хөгжлийн сантай үүнийг холбож болохгүй. Одоо орон нутагт хөрөнгө оруулалтын тодорхой эрх мэдлийг аймгуудад өгье гэсэн санаа явж байгаа. Боловсролын хувьд концевци нь зөв юм” хэмээлээ. Орон нутгийн эрх мэдлийг нэмэгдүүлэхэд үр дүн нь юу вэ? Хяналт хариуцлагын тогтолцоо байна уу? МАН-ын бүлэг Чингис бондыг захиран зарцуулсан мэдээлэл хүргүүллээ. Дүн мэдээлэл нэг зуун тэрбум төгрөгийн зөрүүтэй гарч байна гэдгийг Н.Номтойбаяр гишүүн асууж байсан. “Орон нутагт эрх мэдлийг шилжүүлэхийг би дэмжиж ирсэн. Гэтэл объектуудыг орон нутагт өгөхдөө цөөн хэдэн төгрөг өгөөд барина уу, үгүй юу хамаагүй гэсэн байдлаар хандаж болохгүй. Орон нутагт санхүүгийн эрх мэдэл өгөх хэрэгтэй. Гэхдээ санхүүжилтийг нь дутуу өгөөд орхиж болохгүй. Орон нутгийн эрх мэдэлд Засгийн газраас халдсан халдлага мэт анзаарагдаж байна гэж УИХ-ын гишүүн Су.Батболд хэлж байлаа. Ерөнхий сайд Н.Алтанхуяг:

бө

-Орон нутаг эрх мэдэл шилжүүлэх гэсэн чинь явсаар байгаад бантан болох нь. Хууль зөрчөөд, төсвийн мөнгөөр ИТХ-ынхан зугаалж болохгүй. Аймаг орон нутагт эрхийг нь өгөөд хууль зөрчихгүй байхаар хяналт тавъя. Ингэвэл Бразиль руу бүгдээрээ явахгүй шүү дээ. Су.Батболд гишүүнтэй би санал нэг байгаа. Юмнуудаа эзэнд нь өгөх хэрэгтэй гэсэн юм.

бө

УИХ-ын гишүүн Ц.Баярсайхан “Би хэлэлцэхийг дэмжиж байгаа. Орон нутгийн эрх мэдлийг нэмэгдүүлэх чиглэлээр олон жил ярьсан. Гол нь төвлөрсөн хяналт хэрэгтэй. Чанар, ашиглалтын асуудал дээр эзэн олдоггүй. Орон нутгийн компаниудын чанарыг сайжруулах чиглэлээр олон зүйл хийгдсэн. Хөрөнгийн эх үүсвэрүүдийг мөн хамтад нь шийдэх хэрэгтэй” гэсэн байр суурьтай байлаа.

бө

УИХ-ын гишүүн Ч.Хүрэлбаатар “Эрх баригчид улс орны эдийн засгийг самарсан. Одоо боловсрол, соёлын салбарыг самармааргүй байна” гэсэн бол гишүүн Г.Батхүү “Орон нутагт эрх мэдэл олгох нь зөв ч цаг нь болоогүй байна.   Учир нь одоо орон нутагт объектуудыг шилжүүлээд гүйцээж бариулах бол мөнгө санхүү дутагдана. Дараа нь орон нутагт баахан балгас л үлдэнэ шүү” хэмээж байсан. Ийнхүү гишүүд Төсвийн тухай хуульд нэмэлт өөрчлөлт оруулах тухай хуулийн төслийг хэлэлцэхийг дэмжих санал хураалт явуулсан юм. Санал хураалтаар гишүүдийн дийлэх нь хэлэлцэхийг дэмжлээ.  Харин Боловсролын тухай хуульд өөрчлөлт оруулах тухай хуулийн төслийг хэлэлцэхийг гишүүдийн дийлэнх нь дэмжээгүй юм.

бө

Ийнхүү өнөөдрийн чуулганы хуралдаан өндөрлөлөө. Маргааш 08.30 цагт Төрийн болон төсвийн байнгын хороод хуралдаж дээрх хуулиудын анхны хэлэлцүүлэг хийхийг УИХ-ын дарга захирамжлав.

бө

Н.Энх