УИХ-ын 2012 оны намрын чуулганаар буюу 2012 оны аравдугаар сарын 25-ны өдөр Монгол Улсын Засгийн газарт таван тэрбум ам.долларын бонд арилжаалахыг зөвшөөрч хуульчилсан. Ингээд Засгийн газар эхний ээлжинд “Чингис” хэмээн нэрийдсэн 1.5 тэрбум ам.долларын бондыг арилжаалж, дэд бүтэц, барилга, хөдөө аж ахуй зэрэг салбарт хөрөнгө оруулалт хийсэн. Мөн гол нэрийн бүтээгдэхүүнүүдийн үнийн өсөлтийг сааруулахын тулд хөнгөлөлттэй зээл хэлбэрээр аж ахуйн нэгжүүдэд олгож ирсэн юм.  Үлдсэн 3,5 тэрбум ам.долларын бондыг дэлхийн хөрөнгийн зах зээл дээр арилжаалж, хүлээгдэж буй олон арван ажил, төсөл хөтөлбөрүүдэд хөрөнгө оруулалт хийн, эдийн засгийн хямралыг даван туулах бодит шаардлага байгаа ч эдийн засаг хямарсан, өмнөх өрөө яаж дарах вэ гэж гашиглаж байхад нэмж өр тавих нь Монгол Улсын эдийн засгийг элгээр нь мөлхүүлнэ. Өмнөх зээлээр хийсэн ажлууд зам, барилга гэх мэтийн бүтээн байгуулалтын ажил нь үр шимээ өгтөл маш их цаг хугацаа зарцуулна хэмээн улс төрчдийн эсэргүүлээс болж өнөөдрийг хүртэл хийгдэхгүй л байгаа юм.

a

Өнгөрсөн хугацаанд “Чингис” бондын зарцуулалтын талаар, тэр ч бүү хэл улс орноо барьцаалан байж, ийм их өр тавих хэрэг байсан ч юм уу гэдэг асуудал маш их маргаан дагуулж ирсэн. Энэ маргааныг үүсгэгчид нь парламентын гишүүд голдуу байдаг. Уг нь бол тэд өөрсдөө л хэлэлцэж, бонд  арилжаалан, хөрөнгө босгох шийдвэр гаргасан. Тэдний зөвшөөрсөн хэмжээний гуравны нэг ч хүрэхгүй хувийг арилжаалсны дараа улс орноо урьд хожид байгаагүй их өрөнд унагалаа гэдэг гомдлын үгийг унагах болсон. Нэгэнт шийдвэр гаргасан бол тэрхүү шийдвэртээ эзэн болмоор. Үгүй бол анхнаасаа зөвшөөрөхгүй баймаар. Нэг иймэрхүү эргэн буцсан, орон гарсан хэдэн парламентчтай болчихоод байгаа юм, бид.

a

Өчигдөр Улсын Их Хурлын нэгдсэн чуулганаар Төсвийн хүрээний мэдэгдэл, төсөөслийн өөрчлөлтийг хэлэлцсэн боловч уг хуулийн төсөл нь олонхийн дэмжлэг авч чадалгүй унасан юм. Учир нь  МАН-ын бүлгийнхэн зохион байгуулалттайгаар эсрэг кноп дарсан. Тэдний энэ үйлдэл   шинэчлэлийн Засгийн газрын автортай бүхнийг эсэргүүцэхээр бүр мөсөн сэтгэл шулуудсан гэж харж болмоор. Өмнө хэлсэнчлэн Монгол Улсад хэрэгжүүлэх шаардлагатай маш олон ажил  хөрөнгө оруулалтгүйн улмаас гацчихаад байгааг сөрөг хүчнийхэн мэдэхийн дээдээр мэдэж байгаа. Гэвч тэдний хувьд улс орны эдийн засгийн, улс төрийн гацааг арилгах сонирхол алга. Яаж ийж байгаад шинэчлэлийн Засгийн газрыг унагачихвал дараагийн ээлж хэмээн нэршээд буй “Их эвслийн Засгийн газар”-т шургалчихна гэсэн найдвараа гээлгүй зүтгэж байгаа бололтой.

a