УИХ-ын чуулганаар Ерөнхий сайдыг огцруулах асуудлыг хэлэлцэх үеэр эсрэг санал өгсөн хэмээн АН-ын нэр бүхий найман гишүүн намаасаа хасагдах ёстой хэмээн тус намын Хяналтын зөвлөлөөс гаргасан ажээ. Энэ талаар УИХ-ын гишүүн Р.Бурмаагаас тодрууллаа.

р

Өчигдөр орой Ерөнхий сайдын эсрэг кноп дарсан гишүүдийг АН-аас хасах шийдвэр гарлаа гэсэн мэдээлэл тарлаа. Энэ тал дээр тайлбар өгөөч?

-Тэр шийдвэрийг интернэтээс л  харлаа. Уг нь намын дүрмээр бол тухайн намын гишүүн өөрийг  нь байлцуулж байгаад хяналтын зөвлөлийн хороог хуралдуулах ёстой. Мөн намын  дүрмээр бол “ ... намын шийдвэрийг зөрчин огцруулсан бол...” гэсэн заалт байдаг. Гэтэл ҮЗХ хуралдаад ямар нэгэн шийдвэр гаргаагүй хоёр жил болж байгаа. Энэ бол намын дарга өөрийнхөө шийдвэрийг  л зөрчлөө гэж байгаатай адил. Өнөөдөр нам бол нэг хувь хүн биш. Намын дүрэм зөрчсөн гэвэл дунд шатны хяналтын хороо эхлээд дүгнэлт гаргаад, тэр дүгнэлтийг Хяналтын ерөнхий хороо авч хэлэлцэнэ. Гэтэл дунд шатны хяналтын хорооны дүгнэлт гараагүй. Харанхуй шөнөөр хулгайн  байдалтай нэг хүний даалгавараар ийм ажил хийсэн байна. Дүрмийн бус шийдвэр гэж харж байгаа. Нөгөө талаар УИХ-ын гишүүн хэнээс ч хараат бус байдлаар шийдвэр гаргах эрхтэй. Хамгийн нэгдүгээрт ард түмэн улс орны эрх ашгийг дээдлэнэ гэж төрийн сүлдэндээ тангараг өргөсөн. Тэгэхээр намын эрх ашиг  уу, төр улсын эрх ашиг уу гэдгээ дэнсэлж байгаад улс эх орны эрх ашиг илүү байна гээд л саналаа  өгөх ёстой. Тэгж саналаа өгсөний төлөө УИХ-ын гишүүнийг ингэж дүрмийн бусаар дарамт үзүүлэх гэсэн оролдлого бол буруу.

р

-ҮЗХ-ны хуралд ямар байр суурьтайгаар оролцох гэж байна. Фракцийн зүгээс ч юм уу нөлөөлөөд АН-аас гарчих юм бол ямар хохиролтой байх бол?

-ҮЗХ хуралддагаараа хуралдана. Өөрийн байр суурьтай л орно. Өөр хэн нэгний байр суурь гэж байхгүй. Намын нэрээр хэдхэн хүн юу дуртайгаа хийдэг, төрөл төрөгсөд нь холбогдлоо  гэхэд намын нэрээр гаргаж байдаг. Ард түмний мөнгийг дураараа үрж хэрэглэж байгааг нь хэлэхээр үгүй би намын дарга гээд явдаг байдлыг  таслан зогсоох хэрэгтэй. Энэ тал дээр бидний хэдэн гишүүд тууштай байсан. Түүнчлэн тойргоос гарсан ч байсан, намын нэрээр сонгогдож гарсан ч байсан намаас хөөгдлөө гэхэд УИХ-ын гишүүнээс татаж авч чадахгүй. Угаасаа хууль нь тийм юм. УИХ-ын гишүүний тангараг өргөсөн цагаас бүх ард түмний хүн болдог. Намын төлөөлөгч биш. Тэгэхээр буруу юм яриад байгаа хүмүүст залруулга өгөх нь зүйтэй. Тангараг өргөхөөс өмнө, сонгуулийн саналын дүн гарахаас өмнө улстөрийн намын нэр дэвшигч байх үед гишүүнээс татах эрхтэй. Сонгуулийн дүн гарсны дараа, тангараг өргөсний дараа, ард түмний төлөөлөгч болсны дараа аль ч нам гишүүний бүрэн эрхэд халдаж чадахгүй.

р

-Ерөнхий сайдад Сайханбилэг нэр дэвшиж магадгүй гэх мэдээлэл байна. Танд энэ талаар мэдээлэл байна уу?

-Бидэнд юу ч хэлээгүй л байна. Ерөнхийдөө энэ намын дарга, түүний  тойрон хүрээлэгчид юу хийх гээд, яах гээд байгаагаа хэлэхгүй зөвхөн дотроо яриад намын нэр барьдаг  болоод удаж байна. Бүтцийн өөрчлөлтийн тухай бидэнтэй яриагүй. Хэн ямар сайд оруулах гэж байна гэдгээ яриагнүй. Өнөөдөр төсөв батлахын  өмнө баахан сайд нараа халчихаад эзэнгүй болгочихлоо. Төсөвтэй холбоотой хэлэлцүүлэг маш хэцүү байдалтай үргэлжилж байна. Эхлээд энэ төрийн ажлаа, төсөв батлах ажлаа анхаарах ёстой байхад Сангийн сайдаа халчихаад байна. Явах хүнээр ачаа бүү татуул гэдэг шүү дээ. Тэгээд чамайг  хална гэж  хэлж байгаад төсвөө хийлгэчихээд одоо болохоор төсвөө хамгаалах хүнгүй болгочихоод байна.

р

П.Наран