УИХ дахь “Шударга ёс” эвслийн бүлэг өнөөдөр хуралдаж, ирэх оны Төсвийн тухай хуулийн төслийг хэлэлцэж, бүхэлдээ хэмнэлтийн горим үйлчлэх ёстой хэмээн санал нэгдсэн байна. Гэхдээ боловсрол, эрүүл мэндээс бусад бүх салбарын урсгал зардлыг 30 хувиар хэмнэж, орон тооны цомхтголыг 10 хувиар хийхээр тооцсон аж.

a

Төсвийн ерөнхийлөн захирагч нарын мэдэлд байдаг хөрөнгөнд 50 хувийн зардлын хэмнэлт хийж тоног төхөөрөмж, гадаад томилолт гэх мэт зардлуудыг танах хэрэгтэй. Засгийн газарт улсын төсвөөс хөрөнгө оруулалт хийдэг нийт 41 сан байдаг. Эвслийн бүлэг үүнээс есөн санг татан буулгах, эсвэл өөрчлөн зохион байгуулах бололцоотой хэмээн үзсэн байна.

a

Түүнчлэн “царцаасан” гэх объектуудыг тодорхой эх үүсвэргүйгээр орон нутгийн эрх мэдэлд өгч байгаа нь буруу гээд ирэх онд дуусгаж болох барилгуудын үлдэгдэл санхүүжилтийг гаргах ёстой хэмээсэн юм. Ингэхдээ тухайн обьектуудыг дуудлагаар худалдах, зориулалтыг нь өөрчлөхгүй өөрийн хөрөнгөөр ашиглалтад оруулсны дараа хөрөнгийг нь тодорхой хугацааны дараа төрөөс урамшууллын дараа эргэн төлөх гэх мэт аргуудыг ашиглаж болно гэсэн саналыг оруулсан ажээ.

a

Эвслийн бүлгээс гаргасан дээрх саналуудыг төсөв хэлэлцэх үед чуулганы нэгдсэн хуралдаанд танилцуулах бөгөөд Төсвийн тухай хуулийг хэлэлцэхэд “Шударга ёс” эвслийн бүлгээс ямар нэг саад болохгүй батална гэдгийг албан ёсоор мэдэгдлээ.

a

Энэхүү мэдээллийн дараа тус бүлгийн дарга Н.Батцэрэг сэтгүүлчдийн асуултад хариулсан юм.

a

-Шинээр томилогдох Ерөнхий сайдын асуудалд танай бүлэг ямар байр суурьтай байна вэ?

-Сонгуулийн дүнгээр олонхийн санал авсан хүнийг Ерөнхий сайдад нэр дэвшүүлдэг. Хэрэв хэн ч олонхийн санал аваагүй бол хамгийн олон санал авсан хүнийг Ерөнхий сайдад нэр дэвшүүлээд дараа нь Засгийн газраа байгуулахдаа бусад нам эвслүүдтэй хамтрах талаар зөвшилцдөг. Эндээс гарсан хүнийг Ерөнхийлөгчид өргөн мэдүүлж, үүнийг нь Ерөнхийлөгч УИХ-д өргөн мэдүүлдэг Үндсэн хуулийн заалттай юм. Тийм учраас Ардчилсан нам дотроо ямар хүнийг Ерөнхий сайдад нэр дэвшүүлэх вэ гэдгээс бүх зүйл шалтгаалж байгаа. Үүний дараа бид байр сууриа илэрхийлнэ.

a

-АН-ын ҮЗХ-ноос УИХ-д суудалтай бусад нам эвслүүдтэй хамтарч ажиллах шийдвэр гарсан хэмээн мэдээлсэн. Энэ талаар өнөөдөр бүлгийн хуралдаан дээр ярив уу?

-Бид ерөнхийдөө хоёр янзын байр суурьтай байгаа. Нэгдүгээрт, 2012 оны сонгуулийн дүнгээр хамтарсан Засгийн газар байгуулсан, үүний өмнөх Засгийн газарт бид мөрийн хөтөлбөрөө биелүүлэхийн тулд дөрвөн сайдаа томилж ажлуулж байсан. Хэрэв ажлынхаа үр дүнг үзэх ёстой гэвэл мэдээж хэрэг шинэ Засгийн газарт орж ажиллах асуудал хөндөгдөнө. Гэхдээ эхлээд Ерөнхий сайд хэн болох, шинээр сонгогдсон Ерөнхий сайд бидэнд хамтарч ажиллах урилга өгөх үү, үгүй юу гэдгээс бүх зүйл шалтгаална. Хоёрдугаарт, УИХ-д суудалтай бүх нам эвслүүд нийлж Засгийн газар байгуулж болох юм гэсэн яриа гарч байна. Энэ асуудал бид одоогоор байр сууриа бүрэн нэгтгээгүй байна. Товчхондоо бол бүх зүйл АН-аас, АН-ын шинээр нэр дэвшигдэх Ерөнхий сайдаас хамаарна.

a

-АН-ын ҮЗХ-оос МАХН-тай байгуулсан гэрээг хүчин төгөлдөр бус гэдгийг зарласан. Энэ талаар бүлэг ямар байр суурьтай байгаа вэ?

-Энэ бол нам хоорондын асуудал учраас бүлэг дээр ямар нэг байр суурь илэрхийлэх боломжгүй. Харин өнгөрөгч 2012 онд байгуулсан АН-тай 2016 он хүртэл хамтарч ажиллах гэрээ бол хүчинтэй хэвээр байгаа.

П.Наран

a

П.Наран