Өчигдөр ИНЕГ-ийн Захиргаа удирлагын газрын дарга Т.Батжаргал тэргүүтэй тус байгууллагад ажиллаж байгаа болон халагдсан хүмүүс хэвлэлийн бага хурал хийсэн юм. Уг хурлаар ИНЕГ-ийн одоогийн удирдлага С.Буяндалай УИХ-ын бие даагч гурван гишүүний заавраар ажлаа явуулдаг. С.Буяндалай тус байгууллагад томилогдсоноос хойш мэргэжлийн ажилчдын эрх ашгийг хохироож, танил тал хүмүүсээ ажилд авсан нь бие даагч гурван гишүүний нөлөөллөөс гадуур ойлгох аргагүй болоод байна. 

С.Буяндалай эрх мэдлээ ашиглан 50 хүнийг ажлаас халчихаад 100 хүнийг ажилд авсан байдаг. Харин тэдгээр 100 гаруй хүний  30 нь даргын албан тушаалд ирсэн гэгдэж буй. Тухайлбал, тус газрын үндсэн үйлдвэрлэл явуулдаг Нисэх буудлын үйлчилгээний газар, Аэронавигацын үйлчилгээний газар гэж мэргэжлийн хоёр газар нь тус бүртээ  долоон орон тоотой, хүмүүс нь цөөдөөд ажлаа дийлэхгүй байхад Санхүү, төлөвлөлтийн хэлтэс, Нягтлан бодох бүртгэлийн хэлтэс гэж үйл ажиллагаа нь давхардсан хоёр хэлтэс дээр нэмэгдээд  Тамгын хэлтэс, Хуулийн хэлтэс гэж мөн  л давхар үйл ажиллагаа явуулдаг илүү орон тоог шинээр бий болгон тэдгээр хүмүүсийг ажилд авсан.

Ц.Даваасүрэн  гишүүн гэхэд л ИНЕГ-ын харьяа Мөрөнгийн  нисэх буудалд танил тал болох 13 хүнийг ажилд оруулсан. Х.Болорчулуун, С.Ганбаатар нарын хувьд ч С.Буяндалай даргаар эрх мэдлийн хүрээнд нь шийдвэр гаргуулан олон хүнийг ажилгүй болгож, өөрсдийн хүмүүсээ оронд нь суулгасан хэмээн мэдээлсэн юм.

Мөн Бие даагч гишүүдийн ИНЕГ-т оруулсан гэх хүмүүсийн нэрсийг танилцуулсан билээ.

Тэгвэл дээрх асуудлаар өнөөдөр Төрийн ордны Г танхимд УИХ-ийн гишүүн Х.Болорчулуун, Ц.Даваасүрэн нар дөнгөж сая мэдээлэл хийлээ.  

Ц.Даваасүрэн гишүүн хэлэхдээ, ИНЕГ-ийн өмнөх удирдлагууд зорчигчдын даатгалын мөнгөнөөс хувьдаа завшдаг байсан, мөн олон улсын нисэхийн сургуульд оюутан сургахдаа тухайн сургуулийн төлбөрөөс илүү мөнгө шилжүүлдэг байсан зэрэг асуудлууд шалгалтаар илэрсэн. Эдгээр асуудлыг УМБГ-т шалгаж байгаа гэдгийг Байнгын хороонд албан бичгээр ирүүлсэн баримт ч бий. ИНЕГ-т хүн ажилд оруулсан асуудал бий. Гэхдээ тэгж 100 хүн ажлаас халаад оронд нь 200 хүн ажилд оруулсан асуудал байхгүй. Намайг дүү нараа ИНЕГ-т ажилд оруулсан гэсэн байна лээ. Миний дүү нэр нутагтаа өөр өөрсдийнхөө ажлыг хийж байгаа. Хүнийг гүжирдэж болно, гэхдээ мөнгө төгрөг завшсан хэргийг нь шалгаж ил болгосон гээд хариу өс санаж ингэж хүнийг гүжирдэж болохгүй. Зөвхөн гадаадад хүүхэд сургасан асуудлаар гэхэд 2010 оноос 44 хүүхэд сургасан байдаг.  Энэ хөтөлбөр одоо ч үргэлжилж байгаа.  Канадын “Соба нийгэмлэг” гэдэг байгууллагатай гэрээ хийж, мөнгө угаасан гэдгийг УМБГ шалгаж байгааэ гэвч энэ нийгэмлэг нь Канад улсдаа бүртгэлгүй байсан. Өчигдөр хэвлэлийн хурал хийсэн ИНЕГ-ийн Захиргаа удирлагын газрын дарга Т.Батжаргал гэгч ажлаас халагдсан байсан ч саяхнаас эргэн ажилдаа орж, өс санан ийм мэдээлэл хийж байна. Уг нийгэмлэгтэй энэ Т.Батжаргал гэрээ хийсэн байдаг юм билээ. Одоогоор тус нийгэмлэг рүү 2.6 сая ам.доллар буюу 3.7 тэрбум төгрөг шилжүүлсэн баримтыг шалгаж байгаа гэдгийг УМБГ-аас ирсэн бичгэнд байгаа гэв.

Харин УИХ-ын гишүүн Х.Болорчулуун хэлэхдээ, өчигдрийн хэвлэлийн хурлын үеэр миний охин Б.Хэрлэнг ИНЕГ-т ажиллаж байгаа гэж гүтгэсэн. Гэтэл охин маань одоо ч гэсэн “Дорнод гурил” компанидаа ажиллаж байгаа. Нэрийг нь көв бичиж гүтгэсэн ч гэлээ ИНЕГ-т Б.Хэрмэн гэдэг эмэгтэй ажилладаг юм билээ. Ингэж хүнийг утга учиргүй гүтгэж, хавь ойрын хүмүүстэй нь гүтгэж болохгүй. Тиймээс УИХ дахь Бие даагч гишүүдийн зүгээс энэ гүтгэлэг хийсэн хүмүүсийг хуулт хяналтын байгууллагад өгч шалгуулна. Нөгөө талаар энэ Т.Батжаргал гэгч хуулийн байгууллагаар маш их мөнгөтэй холбоотой хэргээр шалгуулж байж сул чөлөөтэй яваад, элдэв асуудал үүсгээд явж байгаа нь сонин байна. Бидний хамаатан, үр хүүхдээс ИНЕГ-т нэг ч хүн байхгүй гэлээ.

П.Наран