Гэр хорооллыг хямд өртөгтэй орон сууц болгоход Солонгосчууд хамтарна
Нийслэлийн Өмчийн харилцааны газар БНСУ-ын Гёнсанбуг мужийн амтын ажиллагааны хүрээнд тус мужийн хотын захиргааны болон бизнесийн төлөөлөгчид манай улсад айлчилж байна. Өнөөдөр Нийслэлийн Засаг даргын Хот байгуулалт, хөрөнгө оруулалт хариуцсан орлогч С.Очирбат Гёнсанбуг мужийн Хот байгуулалт, барилга угсралтын архитехтур, хотын ерөнхий менежер тэргүүтэй төлөөлөгчдийг хүлээн авч уулзлаа. 2012 оноос хойш амжилттай хамтарч ажиллаж байгаа хоёр тал нийт зургаан төсөл хэрэгжүүлж байна. Тухайлбал, Улаанбаатарт Яармагийн дэнжид бохир ус цэвэршүүлэх байгууламж барих, гэр хороололд амьдрах орчныг сайжруулахын тулд хөрсний бохирдлыг арилгахаас эхлээд инженерийн байгууламжийн шийдэл бүхий хямд өртөгтэй орон сууцаар хангах төсөлд Гёнсанбуг муж санхүүгийн асуудлыг шийдэн тусалж, манай талтай хамтран ажиллаж байгаа юм.Өдөрт нэг метр куб бохир ус цэвэршүүлэх хүчин чадал бүхий байгууламж барих дөрвөн тэрбум дөрвөн зуун сая воны санхүүжилтийг “Койка” төслөөс оруулахаар болж, харин газрын асуудлыг Улаанбаатар хотын захиргаанаас шийджээ. Мөн хоёр тал хамтын ажиллагааны хүрээнд Гёнсанбуг мужийн нэрэмжит “UB dream park” цэцэрлэгт хүрээлэнг бүрэн тохижилттойгоор Улаанбаатар хотод, оюутны хотхонд байгуулах юм. Газрын асуудлыг мөн Улаанбаатар хотын захиргаанаас шийдэж, хөрөнгө оруулалтыг Солонгосын тал гаргаж байна.
Уулзалтын дараа төлөөлөгчид Улаанбаатарт гэр хорооллыг дахин төлөвлөж байгаа ажлын явцтай танилцсан.
Дашрамд дурьдахад Гёнсанбуг муж “Шинэ тосгон” хөдөлгөөн өрнүүлж, богино хугацаанд өндөр хөгжжээ. Энэ туршлагаа манай талтай хуваалцаж, туршлагын дагуу Улаанбаатарын гэр хорооллыг хямд өртөгтэй орон сууц болгоход хоёр тал хамтран ажиллах талаар ч гэсэн харилцан ярилцлаа.
Гёнсанбуг мужийн төлөөлөгчдийн ахлагчаас хамтын ажиллагааны үр дүн ямар байгаа талаар сонирхоход, “Хамтран хэрэгжүүлж байгаа төслүүдээ амжилттай дуусгах талаар уулзалт үр дүнтэй боллоо. Хоёр тал идэвхтэй, хүчээ дайчилснаар бидний хамтын ажиллагааны үр дүн удахгүй гарах болно” гэлээ гэж Нийслэлийн Өмчийн харилцааны газраас мэдээллээ.
СЭТГЭГДЭЛ БИЧИХ