Хяналтгүй төр, хазааргүй морь хамгийн аюултай
УИХ дахь бие даагчид энэ долоо хоногт Байнгын хороо, нэгдсэн чуулганаар хэлэлцэх асуудлын хүрээнд байр сууриа илэрхийллээ. Өнгөрөгч долоо хоногт 2015 оны төсвийг хуулийн хугацаандаа баталсан нь УИХ төрийн ажилд хариуцлагатай хандаж байгаагийн илрэл. Гэхдээ парламентын түүхэнд байгаагүй хүнд нөхцөлд буюу Засгийн газар нь огцорсон, Сангийн сайдгүй нөхцөлд төсөв баталлаа хэмээн УИХ-ын гишүүн, Төсвийн байнгын хорооны дарга Ц.Даваасүрэн онцолсон юм.
Мөн тэрбээр хэлэхдээ, Засгийн газрын бүтцэд саяын хийсэн өөрчлөлтүүдийг бид үргэжлүүлнэ. Гэхдээ механикаар хандаж болохгүй. Төсөв хэлэлцэх явцад төрийн албан хаагчдын тоог автоматаар 10 хувь бууруулах санал орж ирсэн. Ингэж механикаар ажилгүйчүүдийн эгнээг нэмж болохгүй. Тайлбар нь хувийн хэвшилд шилжүүлнэ гэж байсан. Өнөөдөр энэ хямралтай үед хувийн хэвшлийнхэн шинэ ажилтан авах чадваргүй байгаа. Харин яамдуудад байгаа давхардсан орон тоонд тандалт хийж, шаардлагагүй орон тоо, шаардлагагүй агентлагийг олж тогтоогоод арга хэмжээ авах нь чухал байна. Төсөв батлахдаа Гандангийн барилгыг дуусгах хөрөнгийг баталж өгсөн байгаа.
Шамонголын төр өөрийнхөө гол шашныг авч явах ёстой. Харин шашин нь хүнийг зөв ёс суртахуунтай болгох ажлаа хийгээсэй гэж боддог. Ёс суртахуунтай хүн л хууль сахидаг. Дараагийн Ерөнхий сайдад нэр дэвшигч Ч.Сайханбилэгийн асуудал хэлэлцэгдээд явж байгаа тул Бие даагчид байр сууриа илэрхийлэхэд эрт байна. Гол асуудал дараагийн Засгийн газрыг яаралтай эмхлэн байгуулах хэрэгтэй байна. Хүлээлтийн байдал бий болчихоод байна. Дарагаий сонгууль болоход жил шахуу л хугацаа үлдээд байгаа тул хоног хугацаа алдахгүй, олон түмний эрх ашгийн төлөө ажиллах хэрэгтэй байна. Бид сөрөг хүчний байр сууриас хандаж, аль болох тогтвортой байдлын төлөө ажиллана гэдгийг хэлмээр байна гэлээ.
Энэ намын гишүүдийн үгнээс харахад Эвлэрлийн Засгийн газар байгуулья, бүх нам хамтарч явая гэж өтгөн МАНАН байгуулах гэж байна. Урд өмнө нь хоёрхон нам МАНАН байгуулаад ямар муу муухай юм эхэллээ. МАНАН-гийн үед хулгай, боохой гаар ч байсан. Тийм учраас Бие даагчдын зөвлөл “Эвлэрлийн” нэртэй Засгийн газар байгуулвал бид сөрөг хүчин байна. Ер нь сөрөг хүчингүй Парламент болох гээд байна. Парламентийн халуун тогоонд буцалж байгаа сайнэ муу бүхнийг гаргадаг сөрөг хүчин байх ёстой. Энэ үүргийг Бие даагчдын зөвлөл хийнэ гэдгийг хэлмээр байна гэлээ.
Бие даагчдад сайдын суудал амлавал ажиллах уу гэсэн сэтгүүлчийн асуултад “Хяналтгүй парламент гэж байж болохгүй. Ард түмний хяналт заавал байх ёстой. Тэр үүргийг гүйцэтгэ гэвэл ямар ч сайхан амлалтаас татгалзаж чадна. Тэрнээс өөр арга байхгүй ш дээ. Тэгэхгүй бол бүгд нийлээд түнэр харанхуй манан татуулаад яваад байвал олон түмний эрх ашиг л хохирно. Хяналтгүй төр, хазааргүй морь хамгийн аюултай гэдэг тул Бие даагчдын зөвлөл парламентад хяналт тавьж ажиллана” хэмээн хариуллаа.
П.Наран
СЭТГЭГДЭЛ БИЧИХ