Улаанбаатар хотын агаарын бохирдлыг бууруулах, утааг багасгах зорилгоор Мянганы сорилтын сангийн “Цэвэр агаар” төслийн хүрээнд нийслэлийн хэмжээнд 43 гэр цэгийг ажиллуулсан. Эдгээр гэр цэгүүд нь эрчим хүчний хэмнэлттэй хувийн орон сууц болон бүрэн шаталтат “Хас”, “Өлзий”, “Голомт”, “Дөл” зуух болон сайжруулсан гэрийн дулаалга, үүдний гонх зэргийг худалдан борлуулах, бүтээгдэхүүнийхээ талаарх үнэн зөв мэдээлэл хүргэх, ашиглах заавар зөвөлгөө өгөх зэрэг утааны эсрэг хамтдаа тэмцэх ажлын хүрээнд хийж буй үйл ажиллагааныхаа талаар “нэг цэгийн” үйлчилгээг шуурхай хүргэх зорилготойгоор байгуулагдсан юм.
Ингэснээр иргэд ямар нэгэн хүндрэлгүйгээр гэрийнхээ аль ойр байгаа салбараас дээрх бүтээгдэхүүний талаарх мэдээллийг авах боломжоор хангагдсан. Үүнээс гадна утааны эсрэг дуу хоолойгоо нэгтгэх боломжтой болсон төдийгүй эдийн засгийн хувьд ч ихээхэн хэмнэлт гаргасан гэдгээ хэрэглэгчид “Цэвэр агаар”-ын хамт олонд илэрхийлдэг нь гэр цэгүүдийн ажлын үр дүн гэж харж болно.
Эдийн засгийн хэмнэлт болон эрүүл агаар бэлэглэж буй гэр цэгүүдийн Чингэлтэй дүүрэг дэх салбарууд буюу тус дүүргийн 9, 10, 11, 12, 13, 14 дүгээр хороон дахь гэр цэгүүдийн борлуулалтын хугацаа нь дууссан учир хаасан юм.
Үлдсэн хороодод үйл ажиллагаа явуулж буй гэр цэгүүд энэ сарын 24-нд хаагдсан. Өөрөөр хэлбэл 2011 онд явуулах ёстой үйл ажиллагаагаа 24-ний өдрөөр тасалбар болгосон юм. Харин Чингэлтэй дүүргийн дөрвөн хороо буюу тодруулбал 15, 16, 17, 18 зэрэг хороодын борлуулалт энэ өдөр бүр мөсөн хаагдаж байна.
Төслийн хүрээнд тус дүүрэгт 20 орчим мянган зуух борлуулагдах ёстойгоос өнөөдрийн байдлаар 18 мянган зуух борлуулагдсан нь 90 хувийн биелэлттэй байгаа юм. Сонгуулийн ирц ч 90 хувьд хүрдэггүй гээд бодохоор энэ нь өндөр үзүүлэлт төдийгүй цэвэр агаарын төлөө иргэдийн оруулж буй хувь нэмэр ч гэж харж болно. Олны хүч оломгүй далай гэдэг. Иргэд нэгэн зүгт харж, нэгэн хүсэл мөрөөдлөөр жигүүр хийвэл амжилтанд хүрдэг гэдгийг 90 % гэсэн үзүүлэлт баталж байгаа юм. Тиймээс төслийн хамт олон дуугарвал дуу нэгтэй, дугтарвал хүч нэгтэй иргэддээ талархал илэрхийлж буйгаа мэдэгдлээ.
СЭТГЭГДЭЛ БИЧИХ