Ерөнхий сайдаас ирсэн шинэ засагт багтаач гэсэн урилга нь МАН-д  хагарлын үүдийг нээчих дөхлөө. Их мөрөн шалбаагт нийлдэггүй юм гэж намаа харамлаж явсан Ц.Нямдорж гишүүн шинэ засагт орж сайдаар шургалах ажиллагааг эрс эсэргүүцсэн байна. Түүний талд Д.Хаянхярваа нарын цөөнгүй нөлөө бүхий гишүүд байр суурь нэг бат хатуу зогсож байгаа талаар сайтууд шүүрэн мэдээллээ. Засагт орох орохгүйн маргаан дотроо архагууд ба залуучуудын тулаан болсон ч байж мэдэхээр. МАН-ын Удирдах зөвлөлийн гишүүдийн хурлаар тус намын Ерөнхий нарийн бичгийн дарга Ж.Мөнхбатыг ажлаа өгөхийг МАН-ын зарим гишүүд нь шаардсан гэж байна. Ер нь бол түүнийг энэ албан тушаалаас огцрохыг Ц.Нямдорж гишүүн шулуухан  шаардсан гэж байна. МАН-ын зөвлөлд багтах эрхмүүд өчигдөр уулзсаны дараа хэвлэлээр гарсан мэдээллүүдийг харахад Ч.Сайханбилэг Ерөнхий сайдын урилга МАН-д том хуваагдлыг дуудаж буй бололтой байна. Бага хурлаа зарласан МАН-ынхан хайнаа яаж хагалахаас шинэ засаг яаж бүрдэх нь шийдэгдэх болчихлоо.

Өнөөдрөөс МАН засагт жоохон ичингүйрсхийж байгаад орчих юм байна гэсэн таамаг давамгайлж эхэллээ. Шинэ Засгийн газрын сайдын суудлын хуваарилалтыг хэвлэлээр буулгаж эхэлсэн байна. Засгийг хэрхэн хуваах талаарх АН-ын фракцуудын анхны санал Н.Алтанхуяг даргыгаа өсгийлдөж байхдаа бий болсон байж таарна. АН засгийн 51 хувийг /9 яамыг / гартаа авах ба бүтээн байгуулалтын гол яамдуудаа өөртөө авч таарна. Хууль зүйн яамыг мөн найдвартай гарт атгахыг хүснэ.

МАН шадар сайдыг салгаж авах бөгөөд ард нь бодлогын таван яамыг нэхнэ гэдэг нь бараг тодорхой болоод байна. МАХН хоёр яамтай бас дэд сайдтай болохыг хүсч байгаа бол МҮАН-ын Б.Энхсайхан даргад  нь Тавантолгойн цахилгаан станцын даргыг өгөөд тэгсгээд засгаас холдуулах сурагтай. ИЗНН мөн яамгүй болж С.Оюун даргад нь гарын бэлэг болгож нэг байнгын хороо өгчих байх гэсэн таамаг байна. Энэ зургаар бол Их эвслийн гэх ч юм уу, Их гарааны ч юм уу нэг содон нэртэй шинэ засаг эвлэлдэн бүрэлдэж магадгүй юм. 

Харин одоо 2012 оны сонгуулийн өмнөх хаврыг эргэн нэг санацгаая. Нэг л өдөр МАНАН өөрөө задарч АН засгаас гарчихсан. Сонгууль хаяанд ирсэн болохоор популист амлалтын ард нэхэгдэх хариуцлагаас бултсан хэрэг. Дараа сонгуулиар нь аль нэг нам дийлэнх олонх болоогүй. МАН-д хүчтэй сөрөг хүчний суудлыг хуваарилсан. Ард түмний өрөвдөхүй дор байсан Н.Энхбаяр даргыг нь бодоод МАХН-МҮАН Шударга ёс эвсэлд бас хэдэн суудал өгч засагт багтах боломж олгосон. Мөн бие даагчдыг 3 болгож бүл нэмэгдүүлсэн байдлаар ард түмний сонголт хийгдсэн.  Замын тал дээр сонгогчдын энэ сонголт намуудын үзэмжээр өөрчлөгдөх байдал үүслээ. Тогтвортой байдал, том төслийг хөдөлгөх уриан дор нэгдэж буй намууд тохироон дундаа тонших юмаа аваад сонгуулийн өмнөхөн салан оддог жам бий. Энэ талаас нь тооцвол яригдаж буй их эвслийн шинэ засаг МАНАН засгийн адил 2016 онд хоёр дахь хавраа дөнгөж үзээд тарах магадлалтай. Тэгэхээр Ч.Сайханбилэгийн Засгийн газрын орших цаг нь богинохон хийж амжуулах ажил нь их байна. Улстөржөөд бараг ажлаа хийхгүй байгаа чуулган дээр батлагдах хуулийн хүлээлт ч дэндүү олон боллоо. Шинэ засагт ичингүйрэлгүй морилогтун, эрхмүүдээ. Ам.долларын ханшинд төгрөг, иргэд хоёр хөөрхий боллоо.

Пүрэвжавын Баярхүү /тоймч/