Засгийн газарт хамтрах асуудлаар АН, МАН-ын бүлгийн ажлын хэсгийнхэн Төрийн ордонд зөвшилцлөө. Зөвшилцлийн талаар ажлын хэсгийн ахлагч УИХ-ын гишүүн М.Батчимэг, Су.Батболд нар мэдээлэл хийсэн юм.   Засгийн газрыг шинээр эмхлэн байгуулахтай холбоотойгоор УИХ дахь АН-ын бүлгээс байгуулагдсан ажлын хэсэг УИХ дахь МАН-ын бүлгээс байгуулагдсан ажлын хэсэгтэй зөвлөлдөх уулзалтыг өнөөдөр 12.00 цагт Төрийн ордонд эхлүүлсэн юм. Уг уулзалтаар хэлэлцсэн асуудлын талаар  АН-ын бүлгийн ажлын хэсгийн ахлагч  УИХ-ын гишүүн М.Батчимэг, УИХ-ын гишүүн Су.Батболд нар сэтгүүлчдэд мэдээлэл хийлээ.   Энэ удаагийн уулзалтаар талууд үндсэн хоёр асуудлыг хөнджээ. Нэгдүгээрх нь, үүсээд байгаа эдийн засгийн хямралыг хэрхэн давах туулах юм. Энэ хүрээнд Ардчилсан нам ямар санал дэвшүүлж байгаа юм. Хоёр дахь асуудал нь засаглалыг тогтвортой байлгах хүрээнд Үндсэн хууль болоод бусад ямар хуулиудад өөрчлөлт оруулах вэ гэдгээ эхэлж зөвшилцсөн байна. Гэхдээ дээрх асуудлуудын хүрээнд зарим асуудлыг тодруулах шаардлага үүссэн учраас намын удирдлагуудтайгаа ярилцаж, эргэн 17.00 цагт уулзахаар болжээ.   Н.Энх