Засгийн газрын өчигдрийн ээлжит хуралдаанаар хэлэлцсэн асуудлаар Ерөнхий сайдын хэвлэл, мэдээлэл, олон нийттэй харилцах асуудал эрхэлсэн зөвлөх Ц.Мөнхтөр мэдээлэл хийлээ.

a

Тэрбээр хэлэхдээ, өчигдрийн Засгийн газрын  хуралдаанаар хэлэлцсэн асуудлуудаас гурван зүйлийг онцлон мэдээлье. Хөрөнгө оруулалтын сан  байгуулах тухай шийдвэр өчигдөр гаргасан. Монгол Улсын Засгийн газрын 2014 оны 7 дугаар сарын 2-ны өдрийн хуралдааны 36 дугаар тэмдэглэлийг үндэслээд Монгол Улсын Хөгжлийн банк Олон улсын санхүүгийн байгууллагуудтай олон удаагийн хэлэлцээр хийсэн. Үүний дүнд зарим газраас хариу ирсэн. Тухайлбал, JP Morgan банкнаас санал ирүүлсэн. Уг саналын дагуу хөрөнгө оруулалтын сан байгуулах ажлыг дотоодын болон гадаадын хөрөнгө оруулагч байгууллагуудтай хэлэлцээр хийж явуулах эхний санхүүжилтийн эх үүсвэр болгож 100 сая ам.долларын хэмжээтэй санхүүгийн амлалт өгөх эрхийг Хөгжлийн банкинд олголоо. Энэ  “Хөрөнгө оруулалтын сан”-г үүсгэн байгуулах, бодлогоор дэмжих, чиглэл өгч ажиллахыг Сангийн яаманд даалгасан шийдвэр гарсан. Хөрөнгө оруулалтын сан гэдэг бол дотоодын зах зээл дээр мөнгө босгох, үйл ажиллагаа явуулах үйлдвэрлэлийг өргөтгөхөд чухал үүрэгтэй гэдгийг мэдэж байгаа.

a

Дараагийн нэг чухал асуудал нь өнгөрсөн жил Монгол Улсад 10 гаран спортын томоохон тэмцээн уралдаан зохион байгуулсан байна. Олон улсын уралдаан тэмцээн зохион байгуулснаар тухайн улс орноо сурталчилдаг, тухайн улсын  тамирчид олимпын эрх авах болзолоо хангахад тус нэмэр болдог, дэлхийн өндөр зэрэглэлийн тамирчидтай хамтарсан бэлтгэл хийх боломж олдогоороо давуу талтай. Түүнчлэн зохион байгуулагч оронд тодорхой хэмжээний бизнесийн ашиг орж ирдэг. Тиймээс сүүлийн жилүүдэд томоохон тэмцээн уралдааныг улсдаа зохион байгуулах сонирхол нэмэгдсэн. Өнгөрөгч онд манай улс 2.1 тэрбум төгрөгийн санхүүжилт гаргаж, 10 орчим тэмцээн уралдаан зохион байгуулснаас нийтдээ 5500 орчим спортын тамирчид дасгалжуулагчид оролцсон,. Улсад 6.5 орчим тэрбум төгрөгийн ашиг дам бусаар орсон гэх мэдээлэл байгаа. Энэ бүхнийг үндэслээд ирэх 2015 онд 14 спортын тэмцээн уралдаан зохион байгуулахаар боллоо. Томоохоноос нь дурьдвал, Чингис хаан Гран При жудогийн тэмцээн, марафон гүйлтийн тэмцээн, монгол туурагтны ббөхийн барилдаан чөлөөт бөхийн “Мongolian open” тэмцээнүүд байна.

a

Удаах асуудал нь тусгай зориулалтаар ан агнах агнуурын тоо толгой хэмжээг тогтоосон. 2015 онд Монгол Улсын 40 орчим бүс нутгаас 40 тэх, 60 янгир, 20 саарал чоно, 20 халиун буга, 10 бор гөрөөс, 10 зэрлэг гахай агнуулах юм байна. Тусгай зориулалт гэдэг нь гадаадын мэргэжлийн анчид санал хүсэлт гаргаснаар ангийн зөвшөөрөл олгож, Монгол Улс тодорхой хэмжээний орлого ордог. Олсон орлогийн 50 хувь тухайн ан агнуулсан сум орон нутагт очдог. Ихээхэн хэмжээний мөнх сумын санд төвлөрнө гэсэн үг. Нийтдээ 2.1 тэрбум төгрөг сумдад очино. Энэ мөнгөний 50 хувийг байгаль орчныг нөхөн сэргээх, ан амьтныг өсгөж үржүүлэх, байгалийн нөхөн төлбөрт зарцуулдаг хуультай. Тэгэхээр энэ бүхэн тухайн улс орны байгаль орчныг хамгаалах ажилд зарцуулах хөрөнгийн эх үүсвэр болдогоороо онцлогтой.

a

Мэдээллийн дэлгэрэнгүй Засгийн газрын  http://zasag.mn/ цахим хуудаснаас авах боломжтой гэж мэдэгдсэн юм. Мөн тэрбээр хэлэхдээ Ерөнхий сайд өөрийнхөө нэр дээр нэрээр олон нийтийн сүлжээгээр буюу фейсбүүк, инстиграм, твиттерт ямар нэгэн хагя нээгээгүй. Гэтэл сүүлийн үед твиттерт долоо, фейсбүүкт таван хаяг нээгдсэн байна, энэ бүхэн ор үндэсгүй хуурамч шүү шүү гэдгийг онцоллоо. Ерөнхий сайдтай холбоотой, Засгийн газартай холбоотой мэдээллийг Ерөнхий сайдын хэвлэлийн төлөөлөгч болон хэвлэл мэдээлэл олон нийттэй харилцах алба шуурхай хүргэж байх болно. Хамгийн баталгаатай мэдээлллийг Zasag.mn цахим хуудаснаас авч боломжтой гэлээ.

a

П.Наран