Өмнөх Засгийн газрын гаргасан хэд хэдэн шийдвэрийг цуцалж, Шийдлийн Засгийн газар шийдвэрээ гаргаж эхэллээ. Эмнэлгийн зориулалттай баригдсан ч дараа нь оффис болохоор зориулалт нь өөрчлөгдсөн нэг барилга ордны зүүн талд  хэрүүлийн алим болсоор удсан. Энэхүү шинэ барилгыг энэ засаг  дахин “оролдохгүй” эмнэлэг хэвээр нь үлдээнэ гэлээ. Зарим нэг төрийн эзэмшлийн барилгыг суллаж хүүхдийн эмнэлэг болгоно. Хүүхдийн мөнгийг хэрэгтэй өрхөд өгч  оюутны 70-ийг цэглэе гэсэн байна. Малын хөлийн татвар авч орон нутагт нь хөрөнгө  татья. Цаашлаад эхлүүлсэн барилгуудаа ч дуусгая л гэсэн байна. Нөгөө талд нь хэмнэлт хийх тухай багц мэдэгдэл явж байна. Орон тоог цомхотгоё, яам агентлагийг татан буулгая, орлогч нарыг цөөлье. Ерөнхийдөө “хэмнэлт, хэмнэлт бас дахин хэмнэлт” гэсэн санаа Ерөнхий сайдын чуулган дээр хэлсэн үгнээс мэдрэгдэж байна.

а

Аливаа шинэ засаг гарч ирээд дайчин мэдэгдэл хийж олон нийтийн дэмждэг авах алхмыг хийдэг. Үүнд нь бид дасчихсан. Гэхдээ олон нийтийн дэмжлэгийг авахын тулд олон нийтийн эрх ашгийг хангах зарчмаасаа ухарч болохгүй. Хэмнэлтийн ард цомхотголын уухай сонсогдож байна. Хэрэг дээрээ цомхотголыг төр эхлүүлэхээс өмнө хувийн хэвшлийнхэн аль хэдийн хийж эхэлсэн. Гэхдээ тэд бас хүндрэлийг биеэрээ туулж байгаа тул энэрэнгүй байдлаар цомхотголыг шатлан  хийж байгаа. Ажлын өдрийг цөөрүүлэх, цалинг бууруулах, орон тоог нь хадгалж урт амралт өгөх зэргээр ажилчдаа багасгаад эхэлсэн. Харин төрийн албан хаагчдыг цөөлөх тухай байн байн ярьж шинэ төрлийн популизм хийх болсон нь тийм сайн үр дагавар авчрахгүй гэж шүүмжлэх хүмүүс байгаа юм. Төр нүсэр том бүтэцтэй зардал ихтэй, дарга олонтой данхар байгааг шүүмжилсний хариуд төрийн албан хаагчдыг цомхотгох засвар хийх, хэмнэлтийн аянг хэтрүүлэн үнэлэх нь шинэ хэлбэрийн популизм болно. Төрийн, хувийн аль ч байгууллагаас халагдсан тэр хүн ажилгүйчүүдийн эгнээнд очно. Ард нь гэр бүл нь бүлтийнэ. Олон нийт амьдрах гэж яваа нэгнийгээ төрийн албанаас шахаж хэмнэлт хийж, тэр мөнгөөр нь цэцэрлэг барья гээгүй. Олон хурган дарга нарыг цөөлж, албанд унадаг жийп, гадаад томилолт, хүлээн авалт зэрэг тансаглалыг хумьж төсвийн дарамтыг багасгахыг төрд зөвлөсөн. Шийдлийн Засгийн газрын зарим нэг огцом шийдвэрийг харахад энэ зөвлөгөөг буруу ойлгосон бололтой байна. Цомхотгол хийж хэмнэсэн  мөнгийг цэцэрлэгт оруулна гээд хийрхвэл цаашаа хэлмэгдүүлэлт болж мэднэ. Ажлын байр нэмэгдүүлж иргэдээ орлоготой болгож байж хүндрэлээс гаргана гэдэг нь наад захын хүний хэлдэг л онол юм. Ард түмэнд таалдагдахаас нь бус улс орныг хүндрэлээс гаргах дарааллаар шийдвэрүүдээ тулхтай гаргах нь энэ засгийн эхний ЗӨВ алхам болох биз. “Хэмнэлт, бас дахин хэмнэлт” гэсэн уриа цааш явсаар гажуудал болж төрийн ажил үйлчилгээний чанар хүртээмж муудаж зөвшөөрөл лиценз хяналтгүй олгогдож эхэлбэл сөрөг хүчингүй энэ засагт хэн сануулан хэлж, хазаарлан зогсоох вэ.

б

“... Сүүлийн хэдэн жил төсвөө хүслийн жагсаалтаар баталж, дараагаар нь тодотгодог буруу зуршлаасаа салья. Энэ эцэс төгсгөлгүй хууралтаас татгалзаж, он удаан жилийн асуудлаа цэгцэлье” гэж Ерөнхий сайд мэдэгдсэн нь их содон сонсогдож байна. Үүн дээр нэмээд хэдэн жилийн өмнөөс жишиг болгоод байгаа 17.5 хувийн эдийн засгийн өсөлт ч гэсэн “хөөс” байсан гэдгийг зөвшөөрөх цаг болсон. Бодит өсөлт 3-4 хувь гэдгийг одоо зөвшөөрөх ёстой байх. Уул уурхай гадаадын хөрөнгө оруулалт дагаж бий болсон хөөсөрсөн өсөлтийг барьж өөрсдийгөө хуурч иргэдээ хошгируулдгаа болох нь энэ засгийн удаах нэг ЗӨВ болох биз.

б

Ард түмнийхээ дэмжлэгийг авч Төр батжин, урагшаа явна. Гэхдээ үүний тулд таалагдах зүйлийг нь амалж, дутуу дээр нь дөрөөлөх шаардлагагүй юм. Яамны оффист эмнэлэг оруулж, Яармагт бондын мөнгөөр цэцэрлэг хотхон барина гэсэн төлөвлөлт стандартгүй шийдэл гаргаж, амлалт хөврүүлэх ч хэрэггүй. Арав илүү хоног дээрээ явж байгаа шинэ засгийн эхний мэдэгдлүүд бодит хүндрэл, боломжгүй үнэнийг хэлж байгаа сайн талтай ч “хэмнэлт “ гэсэн популист давалгаа үүсгэж зарим нэгнийгээ хэцүүдүүлэх вий гэсэн болгоомжлолыг бас төрүүлж байна.

х

Пүрэвжавын Баярхүү /тоймч/