Хүний хөгжил сангийн хишиг, хувиас оюутны сургалтын төлбөр, эрүүл мэндийн даатгалын шимтгэл, ажлын байр бий болгох хөрөнгө оруулалтад бэлэн бусаар төлөх арга хэмжээг авч хэрэгжүүлж байгаагаа НХХЯ онцолж байна. Энэ оны 11 дүгээр сарын 30-ны өдрийн байдлаар ЭМД-ын шимтгэл хэлбэрээр 472365 хүний 3.7 тэрбум төгрөгийг аймаг, дүүргийн нийгмийн даатгалын хэлтэсүүдэд, сургалтын төлбөр хэлбэрээр нэр нь баталгаажсан 137422 оюутны 66.7 тэрбум төгрөгийг сургалтын төрийн санд тус тус шилжүүлээд байна. Түүнчлэн ажлын байр бий болгох, хөрөнгө оруулалтын зориулалтаар хишиг хувийг нэг удаа бөөн дүнгээр бэлэн бусаар авах хүсэлт гаргасан аймаг, дүүргийн хөдөлмөр халамжийн үйлчилгээний хэлтсүүдээс ирүүлсэн нийт 94 төслийн 9713 хүний 1.6 тэрбум төгрөгийг бэлэн бус хэлбэрээр санхүүжилтийг олгоод байгаа аж. Хүний хөгжил сангийн тухай хуулийн 17.4-т заасан Монгол Улсын иргэнд хишиг, хувийг орон сууцны төлбөр хэлбэрээр хүртээх журмыг Засгийн газрын 2011 оны 8 дугаар сарын 31-ний өдрийн 264 дүгээр тогтоолоор баталсан. Түүнчлэн Хүний хөгжил сангийн 2011 оны төсвийн тухай хуульд нэмэлт, өөрчлөлт оруулах тухай хуулийг 2011 оны 11 дүгээр сард УИХ-аар хэлэлцэн баталж, иргэнд хишиг, хувийг орон сууцны төлбөр хэлбэрээр олгох арга хэмжээнд 20,0 тэрбум төгрөг зарцуулахаар тусгасан. Эдгээр хууль тогтоомжийг хэрэгжүүлэх зорилгоор “100000 айлын орон сууц” хөтөлбөрийн хүрээнд баригдсан орон сууцнаас сонголт хийж, хишиг хувиа орон сууц  худалдан авсны төлбөр хэлбэрээр хүртэх иргэдийн жагсаалтыг Нийгмийн хамгаалал, хөдөлмөрийн сайдын 2011 оны 11 дүгээр сарын 9-ны А/125 дугаар тушаалаар баталж,  иргэний хүсэлт гаргах өргөдлийн маягтын загварыг боловсруулжээ.