Замын хөдөлгөөний дүрэм зөрчиж, аюулгүй байдлыг нь алдагдуулж буй жолооч нарыг илрүүлэх зорилгоор замын цагдаагийн газар далд хяналтын механизмыг нэвтрүүлжээ. Дүрэм зөрчиж буй жолооч нарыг "барих" зорилгоор замын цагдаагийн алба хаагчдын хувийн автомашинд хяналтын камер байрлуулсан байна. Уг камерын тусламжтайгаар зөвхөн өнгөрсөн хэдэн хоногт 240 ноцтой зөрчлийг баримтжуулан Захиргааны хариуцлагын тухай хуульд заасны дагуу 82 жолоочийн эрхийг зургаан сараас хоёр жил хүртэлх хугацаагаар хасчээ. Гудамж, замд тавьсан хяналтын камер, зөрчил илрүүлэгч, энгэрийн болон автомашинд суурилуулсан телекамерын тусламжтайгаар зөрчил илрүүлдэг байсан бол нэмээд алба хаагчдынхаа хувийн машинд хяналтын камер суурилуулсан нь үр дүнгээ өгч байгаа аж.