Ази, Номхон далайн бүс нутгийн далайд гарцгүй хөгжиж буй орнууд дахь Алматын үйл ажиллагааны хөтөлбөрийн хэрэгжилтийн талаархи шинжээчдийн бүлгийн уулзалт энэ  сарын 25-ны өдөр Тайланд Улсын нийслэл Бангкок хотноо боллоо. Уулзалтыг НҮБ-ын Ази, Номхон далайн эдийн засаг, нийгмийн комисс зохион байгуулж, далайд гарцгүй хөгжиж буй Бутан, Лаос, Балба, Монгол улсаас гадна Камбож, Бангладешийн төлөөлөгчид оролцов.

Уулзалтад оролцогчид Алматын үйл ажиллагааны хөтөлбөрийг хэрэгжүүлэхэд АНД-н бүс нутгийн ДГХБО-уудын гаргасан амжилт ба тулгарч буй саад бэрхшээл, түүний дотор худалдаа ба дамжин өнгөрөх тээврийн асуудлыг авч үзэж, дээрх сэдвээр АНДЭЗНК-ын Нарийн бичгийн даргын газраас бэлтгэсэн баримт бичгүүдийг хэлэлцэж саналаа тусгалаа. Шинжээчдийн уулзалтын дүнгээр боловсруулсан баримт бичгийг ирэх 4 дүгээр сарын 12-14-ний өдөр Улаанбаатар хотноо болох тус бүс нутгийн ДГХБО-уудын өндөр түвшний уулзалтад танилцуулан хэлэлцүүлэх юм. АНД-н ДГХБО-ууд дахь Алматын үйл ажиллагааны хөтөлбөрийн хэрэгжилт болон тэдгээр орны хөгжлийн явцад тулгарч буй асуудлын талаархи Өндөр түвшний бодлогын уулзалтыг Монгол Улсын Засгийн газар АНДЭЗНК-той хамтран зохион байгуулах гэж байгаа билээ.

Шинжээчдийн уулзалтад манай улсаас ГХЯ-ны ОУБГ-ын зөвлөх С.Бадрал оролцож, үдээс өмнөх хуралдааныг даргалсан бөгөөд Алматын үйл ажиллагааны хөтөлбөрийн Монгол дахь хэрэгжилтийн талаар илтгэл тавив. Мөн Комиссоос боловсруулсан илтгэлүүдийн талаар санал бодлоо илэрхийлж, зарим нэг санаа тусгав.