Австри улсын Вольфурт хотноо энэ сарын 6-7-ны өдрүүдэд 24 дэх удаагийн “Flatz Austria Open” олон улсын уламжлалт тэмцээн эмэгтэй гурван насны ангиллаар боллоо. Тэмцээний 48 кг-ын жинд барилдсан Монгол Улсын бөх  Э.Нарангэрэл нэгдүгээр тойрогт Унгарын бөх Мелана Паррыг 10:0 онооны харьцаагаар хожиж, хагас шигшээ барилдаанд Польшийн бөх Сара Жезейыржанскаг цэвэр ялж, шувтаргын барилдаанд Польшийн бөх Александра Михаликийг 10:0 онооны харьцаагаар ялж алтан медаль хүртлээ.

Мөн 55 кг-ын жинд барилдсан П.Орхон, 58 кг-ын жинд хүч үзсэн олон улсын хэмжээний мастер С.Бямбацэрэн, 63 кг-ын жинд барилдсан гавьяат тамирчин С.Цэрэнчимэд нар аваргын алтан медаль зүүжээ. Харин өсвөрийн 49 кг-ын жинд барилдсан Н.Анударь нэгдүгээр тойрогт Польшийн бөх Каролина Стрижукийг 8:2, хагас шигшээд Словакийн бөх Нина Колораваг 2:2 онооны харьцаагаар дийлж, шувтаргын барилдаанд Австрийн бөх Еллен Риестерерт 1:2 онооны харьцаагаар дийлдэж мөнгөн медалийн тавцанд зогсчээ.

Энэхүү тэмцээнд Монгол Улсаас олон улсын хэмжээний мастер Э.Нарангэрэл /”Хангарьд” клуб, 48 кг/, П.Орхон /”Алдар” спорт хороо, 55 кг/, С.Бямбацэрэн /”Аврагч” спорт хороо, 58 кг/, гавьяат тамирчин С.Цэрэнчимэд /”Алдар” спорт хороо, 63 кг/, Нандинцэцэгийн Анударь /охидын 49 кг/ нар хүч үзлээ. Дасгалжуулагчаар эмэгтэй үндэсний шигшээ багийн ахлах дасгалжуулагч, гавьяат дасгалжуулагч Б.Батбаяр, дасгалжуулагч П.Чулуунбаатар, шүүгчээр олон улсын шүүгч Л.Нямчулуун оролцсон юм.