Монголын гол нууруудын нэгдсэн хөдөлгөөнөөс өнөөдөр сэтгүүлчдэд мэдээлэл хийлээ. Уг хэвлэлийн хуралд Монголын гол нууруудын нэгдсэн хөдөлгөөний ерөнхий зохицуулагч Я.Цэрэнханд, Ц.Мөнхбаярын итгэмжлэгдсэн төлөөлөгч Д.Ганболд нар оролцсон юм. Тэд энэ удаад Ц.Мөнхбаяр нарыг уул уурхайн компанийг шантаажилж 67 сая төгрөг авсан гэх мэдээлэл тараасан АУМ компанийн захиралд иргэний хэрэг үүсгэсэн гэж мэдээллээ.

Тодруулбал, Ц.Мөнхбаяр энэ оны нэгдүгээр сарын 12-ны өдөр Өвөрхангай аймгийн шүүхэд нэр төрөө сэргээлгэхээр АУМ компанийн захирал Ц.Мягмардоржийн нэр дээр Сум дундын 17-р шүүхэд нэхэмжлэл гаргаж, иргэний хэрэг үүсгэсэн байна.

\ө Учир нь Ц.Мягмардорж нь 2013 оны есдүгээр сарын 18-ны өдөр Монголын гол нууруудын нэгдсэн хөдөлгөөний удирдах зөвлөлийн гишүүн Ц.Мөнхбаяр нарыг бусадтай бүлэглэн дарамт шахалт үзүүлж, айлган сүрдүүлэн олон ч компани, иргэн аж ахуйн нэгжээс ихээхэн хэмжээний мөнгө авсан гэх мэдээллийг олон нийтэд тарааж, хуулийн байгууллагад мэдүүлэг өгсөн гэнэ.

ө Энэ талаар Ц.Мөнхбаярын итгэмжлэгдсэн төлөөлөгч Д.Ганболд ярихдаа “АУМ компанийн захирал Ц.Мөнхбаярыг гүтгэхдээ Eagle Tв, Өдрийн сонин, Өнөөдөр сонин, Монголын мэдээ сонин, Medee.mn, Shudarga.mn сайт зэрэг хэвлэлийг ашиглаж, захиалгат гүтгэлэг тараасан. Энэ бол худлаа мэдээлэл байсан гэдгийг албан ёсоор хэлмээр байна. Иймд нэр төрөө сэргээлгэхээр түүний нэр дээр нэг тэрбум төгрөг нэхэмжиллээ. Түүнчлэн, Б.Гантулга сэтгэл санааны хохирол гэж 50 сая төгрөг түүнээс нэхэмжилсэн байгаа. Ер нь Ц.Мөнхбаяр болон түүний нөхдүүд ямар ч уурхайг шантаажлаж мөнгө авч байгаагүй. Харин хамтарч ажиллаж байсан удаа бий” гэв.

ө Прокуророос ирүүлсэн Б.Гантулга, О.Самбуу-Ёндон нарт Эрүүгийн тусгай ангийн 149-р зүйлийн 149.3-р яллах дүгнэлтийг Дүүргийн Эрүүгийн хэргийн анхан шатны 1-р шүүх өнгөрсөн 2014 оны нэгдүгээр сарын 21-ний өдөр хянаж үзээд, Эрүүгийн байцаан шийтгэх хуулийн 24-р зүйлийн 24.1.1 дэх хэсэгт зааснаар үндэслэн хэрэгсэхгүй болгож цагаатгасан байдаг.

Я.Цэрэнханд: Бид аливаа улс төрийн үйл ажиллагаанд оролцохгүй

р Хурлын үеэр Монголын гол нууруудын нэгдсэн хөдөлгөөний ерөнхий зохицуулагч Я.Цэрэнханд өнгөрсөн хугацаанд өөрсдийн хийсэн ажлынхаа талаар тайлагналаа.

ө Тухайлбал, Монголын гол нууруудын нэгдсэн хөдөлгөөн 2006 онд байгуулагдснаас хойш 10 мянга гаруй иргэдтэй уулзалт хийж, хоёр хуульд нэмэлт өөрчлөлт оруулж чадсан байна. Мөн Монгол улсын нутаг дэвсгэрт олгогдсон 1782 лицензийг цуцлуулжээ. Дээрх хуулийн өөрчлөлтийн хүрээнд улсын хэмжээний нийт нутаг дэвсгэрийн 90 хувь нь 4000 гаруй ашигт малтмалын тусгай зөвшөөрлөөр олон улсад барьцаалагдсан байсныг чөлөөлсөн гэнэ.

ө Энэ талаар ярихдаа “2015 оны хоёрдугаар сарын 18-ны битүүний өдөр УИХ-ын чуулганаар "Урт нэртэй хууль"-ийг хэрэгжүүлэх журмын тухай нэмэлт өөрчлөлтүүдийг баталсан. Үүнийг эсэргүүцэж бид Монгол Улсын Ерөнхийлөгчид гол ус ба ойн сангаа уул уурхайгаас хамгаалах тухай хуулийн нэмэлт өөрчлөлтөд хориг тавихыг хүссэн нээлттэй захидал гардуулсан. Энэхүү хориг тавихыг үндэсний болон гадаадын 30-аад төрийн бус байгууллагуудын сүлжээнээс бас хүссэн юм. "Урт нэртэй хууль хэрэгжиж эхлээд таван жил зургаан сарын хугацаа өнгөрч байхад нэг ч удаа хэрэгжсэнгүй. Хэрэгжээгүй шалтгаан нь лиценз эзэмшиж байгаа хэдхэн хүний эрх ашиг хөндөгдөж байгаатай холбоотой. Хуулинд өөрчлөлт оруулснаар гол мөрөн, ойтой энэ хэсэгт ашигт малтмал ашиглахыг хориглох биш зохицуулах хууль болон хувирч байна. Иймээс бид Монгол Улсын Ерөнхийлөгчид захидал гардуулж , хоёр хоногийн дотор хуулийн өөрчлөлтөд хориг тавихыг хүссэн. Гэвч тэр бидний хүсэлтийг хүлээж авсангүй.

ө Иймд манай Монголын гол нууруудын нэгдсэн хөдөлгөөн ирэх хоёр жилийн хугацаанд ямар ч улс төрийн тэмцэлд орохгүй гэдгээ мэдэгдэж байна. Энэ хоёр жилийн хугацаанд иргэдтэй уулзаж, хуулийн хэрэгжилтийг ажиглагч талаас нь хараад сууна. Хэрэв энэ хугацаанд Монгол Улсын нутаг дэвсгэрт урсаж буй гол нууруудын урсцад сөрөг нөлөөлөл гарах юм бол тэдгээр хууль баталсан нөхдүүдэд хатуу хариуцлага тооцох болно гэдгээ мэдэгдье” гэв.

Б.Дэжид