...Байгаль орчны салбарын шинэхэн сайд нэг гартаа сэлэм, нөгөө гартаа дахиад нэг сэлэм барьчихсан харагдана. Мөнөөх хоёр сэлмээ зогсоо чөлөөгүй, баруун солгойгүй эргүүлж байх юм. Бас нүдээ тас аньчихсан, салхи татуулан давхиж айсуй. Замд нь таарсан танихгүй мэдэхгүй бүгд сайдын сэлмэнд оногдож үзэгдлээ...УИХ-ын гишүүн, БОНХАЖ-ын сайд Д.Оюунхоролыг ийн япон нинжа мэтээр хэтрүүлэн дүрсэлсэнд учир бий. Төрийн тамга атгасан сайд бүхэл бүтэн салбарыг самран, төрд тангараг өргөсөн олон арван түшмэлийг улс төрийн золиос болгож буйн сонгодог жишээг одоо сөхье. Монгол Улсын байгаль орчны салбарт өрнөж байгаа халаа, сэлгээ хэрээс хэтэрснийг дуулгамаар байна. Төрийн яамны бүтцэд хувийн компани лугаа хандаж байгааг нь харсаар суугаад дуугүй өнгөрч чадахгүй нь. Тэр тусмаа энэ яамыг. Байгаль орчны салбар гэдэг хэн дуртай нь цавчиж болдог салбар биш. Түүнчлэн байгаль орчин, тогтвортой хөгжлийн бодлогыг мэргэшсэн боловсон хүчин, эрдэмтэн судлаач,арвин туршлага хуримтлуулсан хүмүүсийн “толгойгоор” тодорхойлдог онцлогтой мэргэжлийн салбар. Энэ дүгнэлт, зарчмыг салбарынхан нь төдийгүй дэлхий дахинаа хүлээн зөвшөөрч, ач холбогдол өгдөг юм.

х

Байгаль орчин, ногоон хөгжил, аялал жуулчлалын яам. Дуудах нэр нь уртасч, үсгийн тоо нь үржин өсөхийн хэрээр агуулга нь бүхэлдээ асар том хүрээг хамарч эхэлсний баталгаа энэ. Цэнхэр гарагийн экосистем хувьсан өөрчлөгдөж, доройтохын хэрээр хүн төрөлхтний хувьд байгалиа хамгаална гэдэг тун чухал сэдэв болоод байна. Энэ ч утгаараа өмнөх Засгийн газар байгуулагдахад тус яам түүхэндээ анх удаа ерөнхий чиг үүргийнх болон томорсон. Экологид онцгой ач холбогдол өгснийг ард түмэн талархан хүлээн авсан түүх ердөө гурван жилийн өмнө бичигдээд байв. Байгаль орчны салбарын яамны бодлогод ногоон хөгжил, тогтвортой хөгжил гэсэн шинэ атлаа хуучин ойлголт энэ үеэс тодорхой тусаж эхэлсэн. Өмнөх Засгийн газрын өөрчлөлтийг одоогийн засаг ч мөн хүлээн зөвшөөрсөн. Бүр томорч, нэгдэх нь чухал хэмээв. Аялал жуулчлалын салбарыг тогтвортой хөгжил, ногоон эдийн засагтай холбон хоршуулах нь хамгийн оновчтой хувилбар гэж үзэн өөрчлөөдөхөв. Гэвч утга агуулга, хамрах хүрээ нь томорсонтой адил хүчирхэгжиж чадсангүй. Чангаран зангидагдах нь бүү хэл, салбарын толгой, удирдлагын тэргүүнээр томилогдсон шинэ сайдын бүтцийн өөрчлөлтөд энэ салбар бүр сульдаж дуусах нь. Засаг солигдох бүрт халаа сэлгээ, томилгоо, намуудын албан тушаалын хуваарилалт төрийн гэх тодотголтой газар бүрт өрнөдөг гаж үзэгдэл олон жилийн улбаатай. Цагаандаа гарсан томилгоо, өөрчлөлтийг өдгөө бид бараг ёс мэтээр хүлээн авдаг болсон нь монголчуудын хувьд эмгэнэл. Яг үнэндээ улс төрийн намуудын талцал, эрх мэдлийн хэмжүүрээр хийгддэг бүтцийн өөрчлөлтүүд Монгол төрийн залгамж, нэр хүнд, итгэл үнэмшлийг дэвслэн дарсаар удлаа. Ийм нөхцөлд төрийн залгамж халаа, төрийн албан хаагчийн нэр хүнд, алсын хараа, үнэнч байхын утга учрын талаар дурсаад ч яах билээ. Монгол Улсын Ерөнхий сайд Ч.Сайханбилэг санхүүгийн хямралтай холбоотойгоор төсвийн байгууллагуудад бүтцийн өөрчлөлт хийж, 15 хувийг цомхтгохоос аргагүй хэмээн учирлаж байв. Ард түмэн хийгээд халагдах жагсаалтад орж магадгүй төрийн албан хаагчид үүнд эсэргүүцэн зэвүүцэлгүй зөвшөөрсөн. Гэтэл Засгийн газрын бүтцийн өөрчлөлт бүхэлдээ улс төрийн намуудын албан тушаалын хуваарилалтаар өрнөж байгаа нь харамсалтай. Бүх яам, агентлагт энэхүү халаа сэлгээ өрнөсөн бөгөөд тэр дундаа БОНХАЖЯ толгой цохиж эхэллээ. Одоо ажиллаж буй болон халагдсан хүмүүсийн мэдээллээс үзэхэд өнөөгийн байдлаар гэхэд яамны бүтцээс 47 хүнийг халчихаж. Орон тоогоо ийн цөөлсөн гэж бүү бодоорой. Хамгийн сүүлд авсан мэдээллээр халсан хүмүүсийн оронд нийт 50 хүн яамны бүтцэд шинээр орж ирсэн бүртгэл гараадахав. “Халагдсан ажилтан, албан хаагчдын оронд томилогдсон хүмүүс голдуу Д.Оюунхорол сайдын нутгийн буюу Завханы гаралтай, бас МАН-ын харьяалалтай юм билээ” хэмээн ярьж байхыг энэ салбарын цөөнгүй хүнээс сонслоо. Төрийн тамга барьсан хүн ийн дураар дургих эрхийг ингэхэд чухам хэн олгоод байна вэ?

р

Төсвийн мөнгөөр наадахын учир

 с

Харин одоо нэг тоо бодъё. Гэнэт ажлаас халагдсан 47 хүний зургаан сарын тэтгэмжийн мөнгө гэхэд ойролцоогоор 145 сая төгрөг болох сурагтай. Лав эхний хоёр ээлжээр 26 хүний нийт 89 сая орчим төгрөгийг төсвөөс олгочихсон байна. Үүний цаана шинээр ажилд авсан хүмүүсийн цалин яамны төсөвт нэмэгдэж орж ирэхээс гадна үйл ажиллагааны зардалд чамгүй мөнгө төсвийн халааснаас урсах нь. Түүнчлэн шинэ сайд өрөөгөө тохижуулж, хивс ширдгээ солихоос эхлээд хэдэн сая төгрөг (хоёр оронтой тоогоор хэмжигдэх) салбарынхаа төсвөөс чангаагаад амжсан сураг ч дуулдлаа. Хэрэв энэ нь хөдлөшгүй баримтаар нотлогдвол зөвтгөөд ойлгочих өөдтэй тайлбар лав олдохгүй биз. Салбарын сайдын халаа сэлгээ дээрх 50-иад хүнээр дуусаагүй юм шүү. Сэлэм атгасан сайд маань орон нутаг руу, харьяа салбарууд руугаа хэдийнэ оржээ. Өнөөдөр цэвэр ус дэлхийн бодлогыг тодорхойлох стратегийн бүтээгдэхүүн болсон. Улс орнууд, тэр дундаа томоохон гүрнүүд алт эрдэнэс, валютын нөөцөө нэмэгдүүлэхээс илүүтэй цэвэр усаа нөөцлөх, ай савыг хамгаалах асуудалд онцгой анхаарал тавьж байна. Энэ ч утгаараа Монгол Улс Усны тухай хуульдаа томоохон өөрчлөлт оруулж, бодлогын хувьд шинэчлэл хийсэн. Тодорхой хэлбэл, Монгол оронд чухалд тооцогдох усны 29 сав газрыг хамгаалах, зүй зохистой ашиглах, хяналт тавих гээд олон асуудлыг хариуцсан захиргаадыг байгуулсан билээ. Угтаа бол амьтай бүхэнд хамгийн чухал зүйл болох усаа Монгол Улс сав газраар нь эзэнтэй болгосон гэсэн үг. Ийнхүү Сав газруудын захиргаад байгуулж, бодлого чиглэл нь ч тодорхой болж, жигдэрч эхлээд байхад нь бараг 60 гаруй хувь буюу 17 сав газрын даргыг саяхан “хусаад” хаячихлаа. Оронд нь бас намын харьяалалтай, мэргэжлийн бус нөхөд томилогдох бололтой. Түүнчлэн Цэнгэг усны төвөөс гэхэд 23 хүн халагдсан мэдээ ирэв. Тун удахгүй Улсын тусгай хамгаалалттай 32 газар нутгийн Хамгаалалтын захиргаадад бүтцийн өөрчлөлт хийх сурагтай. “Бодвол ойрын үед баахан хүн халагдсанаа гэнэт мэдэх байлгүй. Сайдын шийдвэрүүд голдуу шөнийн цагаар, эсвэл гадаадад, хөдөө, орон нутагт томилолтоор явсан хойгуур нь гардаг юм” гэх яриа ч дуулдлаа. Дахиад тоо бодъё. Усны сав газрын захиргааны 17, Цэнгэг усны төвийн 23 хүнд гэнэт халагдсаны зургаан сарын тэтгэмжийг дунджаар тооцоход 130 гаруй сая төгрөг байх болов уу. Ингээд дээрх 145 саяыг нэмбэл 275 сая төгрөгт хүрэх нь ээ. Хэрвээ УТХГН-ийн Хамгаалалтын захиргаанд орох өөрчлөлтөөр дор хаяж 10 хүн ажилгүй болно гэвэл татвар төлдөг та бидний мөнгөнөөс даруй 300 гаруй сая төгрөг хумслах шинжтэй. Угтаа энэ нь зөвхөн нэг салбарын сайдын бүтцийн өөрчлөлтийн дүнд туйлдаа хүрсэн төсвийг бүр тураалд нь оруулах бодлого биш баймаар. Нөгөө талаас нь харвал Монгол Улсын төсөв санхүү хоосорч дундрах нь бүү хэл, халгиж цалгиж буйн баталгаа болохоор зураг бууж байгаа биз. Тэрчлэн халагдсан хүмүүс шүүхэд хандаж эхэлжээ. Тус яамны Төрийн нарийн бичгийн дарга асан Ж.Батболд шүүхэд хандсан бөгөөд шүүхийн шийдвэр түүний талд гарсан байна. Энэ мэтээр сайдын хууль бус үйлдлүүд нь нотлогдож байна. Ийнхүү нэг байгууллагын толгой, баг өөрчлөгдөх бүрт төрийн ажил доголдон завсарладаг, хувиран хувьсдаг гашуун түүх өмнөх Засгийн газрын үед ч харагдаж байсан. Дарга нар нь халагдахтай зэрэгцээд өөрсдийнх нь ажилд авсан мэргэжилтнүүд, албан хаагчид эхнээсээ “ноосоо тушааж” буй нь дуулдав. Ийм завхарсан, задгайрсан үйл явц өрнөж байхад Монгол төрийн бодлого ингэтлээ сульдахаас аргагүй.

р

Завхрал ба хоноцын сэтгэл

р

БОНХАЖ-ын сайдын ийн дураараа авирлаж буйн талаар Ерөнхий сайд Ч.Сайханбилэг болон Төрийн албаны зөвлөлийн дарга Б.Цогоо нарт өнгөрсөн нэгдүгээр сарын 20-доор захидал хүргүүлсэн аж. Гэвч өнөөдрийг хүртэл хариу ирсэнгүй. Засгийн газрын нэг гишүүнийх нь хийж буй үйлдэл олны дургүйцлийг төрүүлээд зогсохгүй, төрийн ажил, бодлого жинхэнэ утгаараа завхарч байгаа нь Ерөнхий сайдад падлийгүй гэж үү. Энэ нь цаад утгаараа засаг барьсан толгой намуудын нэр хүндэд хүртэл хамаатай санагдах юм. Түүнчлэн шинэ сайдынхаа энэ үйлдлийг УИХ-ын гишүүд, Засгийн газрын гишүүд мэдээгүй байж мэднэ. Учир нь Засгийн газар шинээр байгуулагдсаны дараа хийсэн бүтцийн өөрчлөлтийн талаарх мэдээлэл одоогийнхоос төрхөө бүрэн өөрчилчихөөд байна. 2015 оны нэгдүгээр сарын 9. УИХ-ын Төрийн байгуулалтын байнгын хорооны дарга А.Бакей гишүүний гарын үсэг бүхий албан бичиг яамдын сайд нарт хүргэгджээ. Албан бичигт “...одоогийн Засгийн газар шинээр байгуулагдсанаас хойш буюу 2014 оны арванхоёрдугаар сарын 10-ны өдрөөс өнөөдрийг хүртэл тус яам болон харьяа агентлагаас нийт төрийн хэдэн албан хаагч ажлаас чөлөөлөгдсөн, халагдсан, албан тушаал өөрчлөгдсөн талаарх мэдээллийг 2015 оны нэгдүгээр сарын 13-ны дотор ирүүлнэ үү” хэмээсэн байна. (Хариуг БОНХАЖЯ заасан хугацаанаас нэлээд хэд хоногийн дараа хүргүүлжээ).

р

2015 оны нэгдүгээр сарын 26. УИХ-ын Төрийн байгуулалтын байнгын хорооны дарга А.Бакей танаа хэмээн хаягласан БОНХАЖ-ын сайд Д.Оюунхоролын гарын үсэг бүхий албан бичиг хүрсэн өдөр энэ. Үүнд “Тус яамны болон харьяа агентлагаас 2014 оны арванхоёрдугаар сарын 10-ны өдрөөс хойш ажлаас чөлөөлөгдсөн, халагдсан, албан тушаал өөрчлөгдсөн талаарх мэдээллийг хавсралтаар гарган хүргүүлж байна” гэжээ.  Энэхүү хавсралтад тэтгэвэр тогтоолгох насанд хүрсэн нэг, бүтцийн өөрчлөлтөөр тэтгэмж авсан 19, өөрийн хүсэлтээр халагдсан байхгүй, бас ажлаас халсан хүн байхгүй хэмээн тэмдэглэчихэж. Эндээс харахад тус яамны сайдын хийсэн бүтцийн өөрчлөлтөөр нийт 20 хүн тэтгэмж аваад гэртээ суусан болж таарах нь. Үүнээс хойш хийсэн өөрчлөлтөө, одоо гэхэд бараг 100 орчим хүн халснаа мэдүүлсэн, эсэхийг үнэндээ хэлж мэдэхгүй байна. Хэрвээ энэ талаар манай төрийн түшээд мэдсэн бол эрхбиш асуудал хөндөж, асуулга тавих биз ээ. Өнөөдөр байгалийн шинжлэх ухаан, энэ салбарын тодорхойлолт улам бүр баяжиж, хамрах хүрээ нь бидний төсөөлснөөс илүүгээр өргөсөн тэлж байна. Энэ ч утгаараа Монгол орны байгаль орчныг хамгаалах асуудал салбарын яам төдийгүй монголчуудын дэлхийн өмнө хүлээсэн үүрэг болоод байна. Гэтэл БОНХАЖ-ын сайд Д.Оюунхоролд бүтцийн өөрчлөлт, халаа сэлгээ, улс төрийн намын бодлогоос илүүг бодох зав үгүй бололтой. “Урт нэртэй” хуулийг хэрэгжүүлэх журмын өөрчлөлттэй холбоотойгоор бодлогын яамны байр суурь өнөөдөр тун чухал байна. Уул уурхайн олборлолтын их ажил ундрахаас өмнө авч хэрэгжүүлэх, өөрчлөх, зохион байгуулах гээд тум буман асуудал ундарч байна, энэ салбарт.

р

Түүнчлэн улсын тусгай хамгаалалттай газар нутаг, тэр дундаа дархан цаазат газрын хилийн цэсэд өөрчлөлт орж, алт эрдэнэсийг нь ухах талаарх тогтоол шийдвэрүүд шил даран батлагдах муу мэдээ дуулдаж эхэллээ. Чухам ийм үед байгалиа хамгаалах үүрэг хүлээсэн Сайд та байгалийн үзэсгэлэнтэй газруудаа авч үлдэхийн төлөө Төрийн ордонд байр сууриа ядаж нэг удаа чангахан дуугаар илэрхийлэх зориг алга уу. Байгаль орчноо хамгаална гэдэг хүлээсэн үүрэг хариуцлага, ажил гэхээс илүүтэй хувь хүний эх орноо, эх дэлхийгээ гэсэн асар том үнэнч сэтгэлээс их зүйл шалтгаалдаг юм, сайд аа.

 р

Усны сав газрын 17 даргыг халсантай холбоотойгоор тэд манай сонины редакцад ирж байр сууриа илэрхийллээ.

с

Г.Төрмөнх (Идэр голын сав газрын дарга асан)

-Төрийн албыг хэтэрхий улстөржүүлж, албан тушаалыг намын нүдээр харсан томилгоо гэж үзэж байгаа. Учир нь бидний оронд түр орлон гүйцэтгэгчээр тавигдсан хүмүүсийн олонх нь тухайн орон нутгийн ИХТ, намын идэвхтэй гишүүд, дарга. Зөвхөн биднийг хууль бусаар халаад зогсохгүй мэргэжилтнүүдийг маань халж, солих ажил эхэллээ. Тиймээс бид Төрийн албаны зөвлөл, Захиргааны хэргийн шүүх зэрэг холбогдох байгууллагуудад гомдол гаргаж, ийм шалтгаанаар ажлаасаа халагдсан бусад салбарын төрийн албан хаагчидтай нэгдэж, асуудлыг үнэн зөв шийдүүлэхээр цуглаад байна.

м

Н.Болд-Эрдэнэ (хөвсгөл нуур, Эгийн голын сав газрын дарга асан)

-Сав газрын захиргаа тус бүрээр “Усны нөөцийн нэгдсэн менежмент” төлөвлөгөө гаргаад ажиллаж байсан. Ингээд төлөвлөгөөгөө хэрэгжүүлэхийн тулд өнгөрсөн онд бид усны менежментийн чиглэлээр 34 сургалтад хамрагдсан. Өөрөөр хэлбэл, бид ажлынхаа дөрийг олж, мэргэшиж, бэлтгэгдэхэд тодорхой хөрөнгө санхүү, цаг хугацаа зарцуулж, суралцсан гэсэн үг. Бидний оронд сонгон шалгаруулалтад ороогүй, төрийн албан хаагч бус, хаа хамаагүй хүмүүсийг томилж байгаад төрийн жинхэнэ албан хаагчдын хувьд эсэргүүцэж байна.

м

Б.Бат-Эрдэнэ (сэлэнгэ голынсав газрын дарга асан)

-Засгийн газрын бүтэц бүрэлдэхүүнд жижигхэн өөрчлөлт гарахад төрийн албаны бүх шатанд өөрчлөлт орж, ажилтан албан хаагчдыг халж, солих явдал газар авлаа. Энэ бол төрийн албаны, төрийн албан хаагчдыг тогтвор суурьшилтай ажиллуулах бодлого алдагдсаны тод илрэл.

м

М.Батцогт (Шишхэд голын сав газрын дарга асан)

-2015 оны төсөвт хэмнэлт гаргахын тулд эхлээд төрийн албан хаагчдын 15 хувийг цомхтгож, хэмнэлт хий гэсэн. Тэгээд шинэ оны ажлын эхний өдөр ирээд л бид 1-3 ажилтнаа цомхтгосон. Гэтэл одоо биднийг хууль бусаар халчихлаа. Тэгсэн хэрнээ “Танд зургаан сарын цалинтай чинь тэнцэх хэмжээний тэтгэлэг олгоно” гээд байгаа. Дээр нь миний оронд томилогдсон хүнд цалин өгнө. Энэ тэгээд хэмнэлт мөн гэж үү. Харин ч мөнгө нь багтаж ядаад ажлаа хийж байсан хүнийг үндэслэлгүйгээр халаад, тэтгэмж өгөөд, оронд нь тавьсан хүндээ цалин олгоод, бүр нэмж 2-3 хүний орон тоо нэмэх тухай яриад байгаа юм биш үү. Шинээр томилогдсон хүмүүсийг дахинсургана, мэргэшүүлнэ гэхээр эдийн засаг, цаг хугацааны хувьд асар их үргүй зардал гарах нь ойлгомжтой. Бид өөр, илүү зүйл суралцаад ажлаа үргэжлүүлэх зардлаар шинэ ажилчдыг эхнээс нь бэлтгэнэ гэдэг хэмнэлт мөн гэж үү. Үүнээс гадна намууд, сайд нар “Боломж олдсон дээр нь дарга болоод үзье” гэдэг шиг нам солигдоход л төрийн байгууллагын ажилтан, албан хаагчдыг цомхтгож, халдаг үзэгдэл газар авлаа. Үүнийг зогсоох цаг нь болсон.

х

Д.Рэгзэн (Онги голын сав газрын дарга асан)

-Ажлаас чөлөөлөх бол урьдчилан сануулах тухай Хөдөлмөрийн тухай хуульд байдаг. Гэтэл энэ тухай өмнө нь нэг ч удаа сануулаагүй. Өмнөх өдрийнх нь үдээс хойш над руу БОНХАЖЯ-наас нэг эмэгтэй утсаар ярьж “Маргааш санхүүгийн тооллого хийх комисс очно. Бэлтгэ гэсэн” Тэгээд өглөө нь иртэл тооллого энэ тэр хийсэн юмгүй, шууд л ажлаас халсан тушаал уншиж, орны хүнийг томилсон.

х

Шийдлийн Засгийн газар байгуулагдахад л хөдөө орон нутагт албан тушаалын халаа,  томилгоо хийхгүй гэж Ерөнхий сайд хэлсэн. Гэтэл юу болж байна вэ. Үүний цаана хамгийн гол нь төрийн залгамж зарчим алдагдаж байна. Залуучуудад одоо төрийн албан хаагч болж, тангараг өргөнө гэдэг чухал зүйл биш, ердөө л намын халаа сэлгээний өнцгөөс ойлгогдож байгаа. Төр удирдаж байгаа хүмүүс өвгөдийн хэлдгээр “Ямхын төдий түшмэл”-ийн ухаанаар асуудалд хандаж байгаа нь харамсалтай.

х

Т.Болдбаяр (Завхан гол, Хяргас нуурын сав газрын дарга асан)

-Усны сав газар байгуулагдсанаар өнгөрсөн онд улсын төсөвт 33 тэрбум төгрөг төвлөрүүлсэн. Үүнийг ус бол мөнгө, цаашлаад бизнес гэж хүмүүс харж байхыг үгүйсгэх аргагүй. Ус бол стратегийн үнэт зүйл. Тиймээс энэ чиглэлийн мэргэжилтэн, албан хаагчид мэргэшсэн байх ёстой. Гэтэл манайд усны мэргэжлийн хүн маш цөөхөн. 2007 оноос хойш нэг ч хүн усны чиглэлээр мэргэжил эзэмшээгүй. Энэ нөхцөлд цөөнгүй хүнийг тодорхой төсөв, зардал гарган байж бэлтгэж, мэргэшүүлээд явж байхад улс төрийн үүднээс ингэж хандаж болохгүй баймаар.

а

Э.Пүрэвжав (Хараа голын сав газрын дарга асан)

-Алт зэрэг газрын баялаг усаа дагаж, ус руу ойртох тусмаа нөөц нь нэмэгдэж байдаг өвөрмөц тогтоцтой. Алт болон бусад баялгийг авахын тулд холбогдох хориглосон хуулийг өөрчлүүлэх ажлаа хүмүүс маш амжилттай хийсэн. Одоо түүнийг хамгаалж буй сав газрын захиргаадын хуучин удирдлагуудыг өөрийн хүнээр солих ажиллагаа эхэлж байна. Эхлээд удирдлагуудыг нь, дараа нь мэргэжилтнүүдийг нь халж, шинээр хүмүүс томилж эхэллээ. Ингэж хэлэх үндэслэл нь алтыг ялган авах хамгийн чухал түүхий эд нь ус. Усыг харин тооцоолж, хориг тавих газар нь Сав газрын захиргаад. Иймээс л улс төр хийгээд ашиг сонирхлын үүднээс ийм халаа, сэлгээг хууль зөрчин байж хийж эхэллээ.

х

 Б.Цэцгээ (Ерөө голын сав газрын дарга асан)

-Нэг өглөө л гэнэт яамны мэргэжилтнүүд олон хүний өмнө шууд халагдах тушаал уншиж, миний оронд түр орлох хүнээ танилцуулж байгаа юм. Ажлаас халагдсан үндэслэл, шалтгаан тайлбарлаагүй. Үүний цаана хүний нэр хүнд явж байна. Гэнэт халагдахаар “Энэ яагаад халагдчихав, авлига авсан юм биш биз” гэх мэт хүмүүсийн хандлага мэдрэгдэж байна. Төр аль ч салбарт бодлого хэрэгжүүлэхдээ оновчтой, зөв, хууль ёсны дагуу хийх ёстой. Сав газрын захиргаадын хувьд энэ удаад тийм байж чадсангүй. Тиймээс бид нэр төрөө сэргээлгэнэ, асуудлыг хуулийн дагуу шийдүүлэхээр ирцгээлээ. Ц.Дамдинсүрэн (Таац голын сав газрын дарга асан) -Намайг мөн 16.00 цагийн үед нэг хүн залгаад “Маргааш тооллого хийнэ” гэж ярьсан. Тэгээд л бусдын адил тушаал уншсан. Энэ зөв дэс дараатай, үндэслэлтэй зүйл байсан бол миний хувьд хүлээн зөвшөөрнө. Гэтэл урьдчилан сануулсан зүйлгүй, гэнэтийн байдлаар, хууль, дүрэм, журам огт мэдэхгүй хүнтэй харилцаж байгаа мэтээр салбарын яам нь ийм үйлдэл гаргасанд гомдолтой байна. Манай мэргэжилтнүүдийг эхнээс нь халсан тухай мэдээлэл сая ирсэн. Хүний амьдрал хойно банкны зээлтэй гэх мэт асуудалтай л байж таарна. Гэтэл гэнэт халагдсаны мөнгө олгоно гээд л мэргэшсэн ажлаас нь халчихаж байгаа нь төрийн бодлогын өнөөгийн дүр төрхийг харууллаа.

х

Б.Болд