Махны үнэ өсч байгаа нь иргэдийг нилээдгүй бухимдуулж байна. Сүүлийн нэг сарын хугацаанд махны дундаж үнэ 11.8-12.1 хувь өсөөд байгаа тухай ҮСХ-оос мэдээлж буй юм. Тухайлбал, хүнсэнд голчлон хэрэглэдэг үхрийн махны үнэ 4.9-5.7 хувь, ямааны махны үнэ 9.0 хувь, адууны махны үнэ 12.8 хувиар тус тус өсчээ. Үнийн өсөлт ийм маягаар үргэлжлээд байвал иргэд л зүдэрнэ. Төв банкны ерөнхийлөгч инфляцийн нийт өсөлтийн 1/3-ийг махны үнийн өсөлт бүрдүүлж байна гэж хэлж байсанчлан, монголчууд махны үнээ дийлэхгүй хэмжээнд хүрэх нь ээ. Монголчуудын хамгийн их мах иддэг баяр Цагаан сар сарын дараа болох гэж байна. Бас мах ховорддог хавар болох гэж байна. Гэхдээ 2012 онд нийслэлийн хүн амын хэрэгцээнд зориулан 12 мянган тонн нөөцийн мах бэлтгэх шийдвэр гарсан. Улаанбаатар хотын Захирагчийн ажлын албанаас тус шийдвэрийн дагуу 2012 оны нийслэлийн хүн амын хаврын хэрэгцээнд зориулсан 12 мянган тонн махыг бэлтгэх 23 үйлдвэр, аж ахуйн нэгжтэй гурвалсан гэрээ байгуулж эхлээд байгаа гэсэн. Улмаар нөөцийн махыг 1 дүгээр сарын 15-наас худалдаанд гаргахаар төлөвлөж байгаа бөгөөд тухайн үеийн зах зээл дээрх махны үнээс шалтгаалан нөөцийн мах борлуулах үнийг тогтооно гэж буй юм. Өнгөрсөн онд нийслэлийн хүн амын хаврын хэрэгцээнд зориулан мөн 12000 тонн махыг 14 үйлдвэр бэлтгэн нийлүүлж, 1 дүгээр сарын 15-ны өдрөөс эхлэн нийслэлийн 9 дүүргийн 274 цэгээр  худалдаанд гаргаж байсан юм. Нөөцийн мах бэлтгэх, хяналт тавих, борлуулах үйл ажиллагааг хамтран зохион байгуулахаар Улаанбаатар хотын Захирагчийн ажлын алба болон Монголын махны холбоо хамтарсан гэрээ байгуулсан. Тэгэхээр нөөцийн мах худалдаанд гарчихвал, учиргүй их өсөлт хумигдах болов уу гэсэн найдлага байна.