Монгол Улсын Ерөнхий сайд  өчигдөр орой  олон нийтэд хандаж мэдээлэл хийлээ. Тэрбээр мэдээллийнхээ үеэр Оюутолгойн гүний уурхайн бүтээн байгуулалт гацаанаас гарч, бодит ажил хэрэг болж буйг онцлон тэмдэглэв. 

Ерөнхий сайд мэдээлэлдээ, "Олон улсын банкууд 4.2 тэрбум ам.долларын төслийн санхүүжилт олгохоор энэ долоо хоногт эцэслэн шийдвэрлэсэн байна. Ирэх 12 сарын 16-нд Улаанбаатар хотод албан ёсоор баталгаажуулж, олон улсад зарлахаар товлолоо. Гүний уурхайн их ажил эргэн сэргэж, эрчтэй хөдөлсний эхний үр дүн татварын орлого 70 сая ам.доллар буюу 140 шахам тэрбум төгрөг төрийн сангийн дансанд шилжин орохоор боллоо. Нэг том төслийн эргэн сэргэлт бусад том төслүүдийг хөдөлгөөнд оруулж байна" хэмээв. Ингэснээр Оюутолгойн далд уурхайн хөрөнгө оруулалт орж ирж, бүтээн байгуулалтын ажил эхлэх боломж бүрдэж буй юм.