“Америк маягийн “Хар баасан гараг” хэмээх супер хямдрал нь Монгол Улсад анх удаа жинхэнэ утгаараа 26-аас 27-д шилжих шөнө Номин Юнайтед их дэлгүүрт болох гэж байна. Энэ шөнө электрон бараа, гэр ахуйн бараа, гоо сайхан, бугуйн цаг, хувцас, сэргээгдэх эрчим хүчний бүтээгдэхүүн, америк хүнс, герман обойны олон олон онцгой бараанууд супер хямдралд өртлөө.

Beko брэндийн бүтэн автомат угаалгын машин 849,990-ээс 499,990, ASUS брэндийн зөөврийн компьютер 749,999-өөс 499,990, Embawood амьсгалдаг модон тавилгын буйдан 4,499,990-өөс 1,599,990, сүлд мод 399,990-өөс 159,990 төгрөг болж зөвхөн Номин Юнайтед их дэлгүүрт Black Friday хямдрал дээд цэгтээ туллаа. Энэ сарын 26-ны 22:00-02:00 цаг хүртэл. Та яараарай. Түрүүлж ирсэн нь томыг авна”. Ийм сүржин мэдээлэл гар утсанд мессэжээр ирж, хүн болгон л тэр хямдралыг ярьж, өчигдөр хамт олон, гэр бүл, найз нөхдөөрөө нийлж аваад л “Номин”-г нүүлгэх санаатай очлоо. 

Гэтэл угаасаа хямдхан, үнэгүй шахам зүйлд “нугасгүй” монголчууд сурсан зангаараа оччерлож, алаан болов. Хүмүүсийг тэгж их цуглана чинээ санаагүй “Номин”-гийнхон ч сандарсан нь мэдээж биз. За энэ ч яах вэ, зарим хүмүүс хямдралтай бараа авахаасаа илүүтэй амьд гарч ирсэн дээ баярласан байна лээ шүү. Үүнээс гадна өчигдрийн 22:00-02:00 цаг хүртэл үргэлжилсэн хямдралын буянаар гадаа хонох шахав. Ойрын хэдэн жил үзээгүй түгжрэлийг тэнд л харлаа. Ийм аймшигтай түгжрэл, их оочерийг үүсгэсэн “Номин”-гийнхон ямар ч зохион байгуулалтгүй ажилласан юм. Мөн тэнд хямдарсан бараа бараг л алга. Юун “Хар баасан гараг”. Америкт бол “Хар баасан гараг”-ийн хямдралыг жинхэнэ утгаар нь зохион байгуулдаг. Гэтэл “Номин”-гийнхон хямралд орж, сэтгэлээр унаад буй ядарсан иргэдээрээ даажигнаадахлаа. Арай л дэндэв.

Угаасаа өндөр үнэтэй бараатай дэлгүүрийн юм хямдарна гэж юу байх вэ дээ. Тэгээд ч хүмүүс 299 мянгаар ганц зурагт авчих санаатай хайгаад хайгаад олоогүй гэнэ билээ. Зарим нь бүр үүдэнд нь очоод ч орж чадаагүй бол зарим нь их түгжрэлийн сүүлээс аяа бодсон гэхэд болно. Ер нь их хямдрал гэдэг сүржин нэртэй, даржин арга хэмжээнүүд сүүлийн үед их болоод байхад иргэд дандаа л хууртах юм даа. Аргагүй   л амьдрал хэцүү байгаагийн шинж энэ биз ээ. Ингээд илүү үг нуршилгүй, “Номин”-гийнхонд даажигнуулсан хүмүүсийн сэтгэгдлийг хүргэж байна.

Sukhbaatar Enkh: Овоо юм болж байна аа.

Nyamka Kopite: Угаасаа дор хаяж 50 хувь хямдруулахгүй бол авах хүн байхгүй байх өө...

Urangoo Sirena: Пээ намхан хүн бол зүгээр л дэвсүүлэх юм байна.

Jambaldorj Khosbayar: Балай новшнууд зөндөө олон салбартай байж заавал ганцхан газар алалцуулаад. Гэртээ харих гэж хэдэн цаг түгжирлээ шүү дээ

Тулгаа Ч: Номингийнхон минь ээ. Ядарсан ард түмнээрээ битгий даажигнаад байгаач дээ. Та нар нэг хошгируулна, улстөрчид нэг хошгируулна. Биднээс чинь юм үлдэхгүй нь байна шүү. Хар шөнөөр, бөөн түгжрээнд ороод л, цагдаа нарт загнуулаад л, орох гэж ингэж алалцаад л, хувцас хунараа уралцаад л, халаасны хулгайч нарт хамаг юмаа сэгсрүүлээд арай гэж орж байхад урмыг нь бодоод олигтой хямдруулчихгүй дээ. Дээд тал нь 10-20 хувь, 10-80 мянган төгрөгөөр л хямдарсан байсан шүү. Арай л байсан шүү.

Gantulga Turmunkh: Өдий том болчихоод нэг муу “Номин”-д хулхидуулсаар байгаа юм уу?

Doogii Oogii: Хүмүүс ээ хямдрал нэрээр гүйлгээгүй бараагаа зарах гэсэн шоу шүү дээ. Үүнд нь битгий хууртаач ээ. “Номин” үргэлж худлаа байдаг шүү дээ. Очоод үзэхэд хамгийн хэрэгцээ муутай бараагаа өчүүхэн хямдруулж ард түмнийг молигодож байдаг шүү дээ.

Bold Tuuruul: “Номин”-гийн бараанууд ихэнх нь хулхи

Gegi Gerlee: “Номин” угаасаа худлаа хямдрал зарладаг ш дээ

Janchivdorj Bolor-Erdene: Бас урамшууллаа өгөхгүй худлаа хуурна гээч

Davaadorj Dorjsuren: Хүнд хэрэггүй новшоо шахаж байгаа юм шүү дээ цаадуул чинь

Эх сурвалж: www.mminfo.mn