Монголын Хөрөнгийн Биржийн гүйцэтгэх захирал асан, “Новел инвестмент”-ийн гүйцэтгэх захирал Д.Ангар хэвлэлийн хурал хийв. Тэрбээр Хөрөнгийн Биржийн хувьчлал, мөнгөтэй цөөн хүний хүрээнд явагдах магадлалтай байна. Иймд олон нийтийг нэгтгэн, хөрөнгө хуримтлуулах төслийг эхлүүлэх болсон тухайгаа өнөөдөр зарлалаа.

Ирэх оны төсвийн орлогод хувьчлалаас орж ирэх орлогын хэмжээг 80 тэрбум төгрөг гэж тооцсон байна. Ингэхдээ Төрийн банкийг 75 тэрбум төгрөг, Хөрөнгийн Биржийг таван тэрбум төгрөгөөр хувьчлахаар баталсан.

Иймд  “Новел инвестмент”-ийн гүйцэтгэх захирал Д.Ангар 50 мянган  иргэнийг хувьчлалд оролцуулж, иргэн бүрээс 100 мянгаас доошгүй төгрөг цуглуулах төслийг эхлүүлэхээр болсон гэнэ. Үр дүнд нь  5-20 тэрбумыг төвлөрүүлэх боломжтой юм байна.

Тэрбээр “Хэвлэх үйлдвэрийн хувьчлалыг авахаар залуучууд нэгдэж, хөрөнгө цуглуулсан ч цаг хугацаа хязгаарлагдмал байсан учраас материалаа өгч амжаагүй. Гэвч монголчууд өөрсдөө нэгдсэн зохион байгуулалтад орж, санхүүгийн боломжоо нэгтгэж чадвал хувьчлалд хамтран оролцож, өмчдөө эзэн болох боломж байна гэдгийг бид харлаа. Хувьчлалд оролцох хүсэлтэй Монгол Улсын иргэн бүр 100 мянга болон түүнээс дээш төгрөгийг цуглуулж, олон нийтийн санхүүжилтыг бүрдүүлж чадвал  Хөрөнгийн биржийг өөрсдөө өмчлөх эрхтэй болно” хэмээв.

 Хөрөнгийн Биржийг хэзээ хувьчлах нь тодорхойгүй байгаа ч олон нийтийн сан байгуулж, хөрөнгө хуримтлуулах ажлыг даруй эхлүүлэхээр, ийн бэлтгэл ажилдаа оржээ.

Г.Тэгшсүрэн