Өнгөрсөн сарын 30-ны өдөр болж өнгөрсөн Хэвлэх үйлдвэрийн барилгыг Араб гаралтай, монгол иргэншилтэй Абдул Карим гэгч хижээл насны кавказ эр 24 тэрбум төгрөгөөр худалдан авсан нь монголчуудын сэтгэлийг гонсойлгосон хэвээр байна. Мэдээж энэ асуудалд монгол хүн бүр сэтгэл оюунаа чилээх нь гарцаагүй. Ийн хэлэхийн учир нь уг дуудлага худалдаа болоод дөрвөн хоног өнгөрсөн ч гэлээ сошиал ертөнцөөр олон нийт санал бодлоо илэрхийлсээр байгаа юм. Өөрөөр хэлбэл, Монгол Улсын үндэсний аюулгүй байдлыг энэ үйл явдалтай холбон олон нийт хөндөж эхэллээ гэсэн үг. Шалтгаан нь гэвэл Арабын ертөнц бүхэлдээ хүчирхийлэгч машин гэдгийг дэлхий даяараа мэднэ. Тиймээс тэднээс дэлхийн олон улс орон зайгаа барьж эхэлчихээд байхад манайхан төрийн ордныхоо хажууд өөрийн хүссэн зүйлээ хийх боломж олгон обьектоо худалдсан явдлыг олон нийт буруутгаж буй юм. 

Түүнчлэн энэхүү Араб эрийн талаар уржигдар “Хас”-ын гэх тодотголтой Ч.Ганхуяг ч бас сэтгэл эмзэглэж байгаагаа ч хэлж байсан. Тухайлбал, тэрбээр “Абдул Каримын их мөнгөний ард хэн байгааг, энэ их мөнгө бохир эсэхийг шалгах хэрэгтэй. Энэ мөнгө улсын төсөвт буюу бидний халаас руу орно. Нөгөөтэйгүүр хувьчлал хэдийгээр шийдэгдсэн ч 24 тэрбум төгрөгийн эх үүсвэрийг маш сайн нягтлах ёстой. Төр өөрөө мэдэхгүйгээр бохир мөнгө авчихаж болохгүй шүү дээ. Энэ бүх шалгах, хянах үйл ажиллагаа ном журмынхаа дагуу хийгдэх байх” гэх үгийг олон нийтэд дайсан юм. 

Тэгэхээр Абдул Карим гэгч манай улсад ирээд 30 жил амьдарсан эсэхийг нь хэн нотлох юм бэ гэсэн асуулт гарч ирж буй юм. Хэвлэл мэдээллийн хэрэгслээр л мань хүнийг монголд 30 жил амьдарч байгаа гэж бичсэн болохоос түүний хэчнээн жил манай улсад амьдарсныг нь батлаад хэлчих хүн үнэндээ байхгүй байгаа шүү дээ. 

Харин учир мэдэх хүмүүсийн хэлж буйгаар түүнийг монголд яагаад ч 30 жил амьдрах боломжгүй гэдгийг хэлж байсан юм. Ийн хэлэхийн учир нь тэрбээр өнөөдөр 60 настай ч амьдралынхаа ихэнх хугацааг Арабын ертөнцөд өнгөрөөсөн. Тэгэхээр түүний амьдралын хэм, хэмнэл ямар байсан. Аль урсгалыг дэмждэг байв гээд олон, олон асуулт урган гарч ирж байна.Түүнчлэн түүний эхнэрийг 24 настай монгол бүсгүй гэж хэлж байгаа ч энэ бас л баталгаагүй мэдээлэл. Тиймээс энэ кавказ эрийн талаар олон нийт ихэд сонирхож түүний тухай мэдээллийг илүү авахыг хүссэн ч түүний монгол түншүүд Абдул Каримийг сайн мэдэхгүй гэх хариултыг өгч байсан юм. 

Мөн зарим эх сурвалжын хэлж буйгаар түүнийг хэвлэх үйлдвэрийн барилгын хувьчлалд орохоор эртнээс бэлдэж байсан гэх мэдээллийг өгсөн. Харин НИТХ-ын зарим гишүүн дуудлага худалдааны үеэр гэнэт гадаад нөхөр гараад ирэхээр нь ихэд гайхсан гэдгээ ч хэлж байсан. Яг үнэндээ бидэнд л 24 тэрбум төгрөг их мөнгө болохоос биш Арабын шейх ноёнтонд зүгээр л нэг өдрийн тансаглалынх нь мөнгө гэж хэлэхэд үнэнээс хол зөрөхгүй байх. 

Хэдийгээр бид өнөөдөр гадны нөхөрт хотын А зэрэглэлд байрлалтай бүр Засгийн газрын ордонтой хаяа залган орших Жанжин сүхийн ажиллаж байсан хэвлэх үйлдвэрийг алдсан нь оройтсон ч гэлээ Абдул Каримын мөнгөний эх үүсвэр хаанаас угшилтай вэ гэдгийг нь шалгаад үзэхэд гэмгүй л байх. Тэгээд энэ мөнгөний учир начрыг шалгахыг нэр төртэй компанийн захирлууд төдийгүй монголын улстөрчид хүсэж буйгаа илэрхийлж байсан. Манайхан хэзээнээсээ л авлигад дуртай хүмүүс болохоор магадгүй Абдул Каримын монгол иргэншилийг нэг хоногийн дотор хийсэн байхыг үгүйсгэхгүй. Ийн хэлэхийн учир нь хэрвээ уншигчид санаж байгаа бол өнгөрсөн аравдугаар сарын 7-ны өдөр Нийслэлийн мэргэжлийн хяналтын ерөнхий газарт СХД-ийн иргэдээс Катар улсын иргэд их хэмжээний идлэг шонхрыг хууль бусаар тэжээж байна гэсэн мэдээлэл ирж байсан. Ингээд тус газраас өгсөн мэдээллийн дагуу шалгалт хийхэд СХД-ийн 32 дугаар хорооны нутаг дэвсгэр, Баруун туруунд 61 шонхор шувуу тэжээж байсан катар иргэдийг илрүүлж байсан. Гэтэл дээрх шувууны 30 нь зөвшөөрөлтөй, харин 31 нь зөвшөөрөлгүй байсныг тухайн үед мэргэжлийн хяналтынхан Эрүүгийн цагдаагийн газарт шилжүүлэн өгч байсан. Гэтэл Сонгинохайрхан дүүргийн прокурорын байгууллага дээрх хэргийг хянаж үзээд эрүүгийн хэрэг үүсгэх шаардлагагүй гэж үзжээ. Харин захиргааны арга хэмжээ авахуулахаар Нийслэлийн мэргэжлийн хяналтын газарт хүсэлт явуулсан байна. Тухайн үед олон нийт энэхүү хэргийн эзнийг Абдул Карим гэж мэдээгүй. Сая л түүнийг шонхор шувууны наймаачин гэдгийг нь мэдсэн хэрэг л дээ. Үүнийг дахин, дахин нуршаад байгаагийн учир гэвэл Абдул Каримийг тухайн үед албаны хүмүүс монгол иргэншилтэй Араб хүн гэж хэн ч мэдээллээгүй. Энэ асуудал өнгөрсөн аравдугаар сард нэлээд дуулиан шуугиан болж байгаад л намжиж байсан ч харин бүр зөвшөөрөлгүй байсан 31 идлэг шонхорынхоо хэргийг хэрэгсэхгүй болгосон нь хачирхалтай. 

Ямартай ч одоо тэрбээр нийслэл хотын маань зүрх болсон А зэрэглэлийн газрыг монголчуудын нүдийг нь орой дээр нь гаргаж байж 24 тэрбум төгрөгөөр худалдан авчихлаа. Харин одоо түүнийг энэхүү газар ямар барилга барих бол гэсэн хүлээлт нийгэмд бий больсноос гадна Абдул Карим гэгч нөхөр яг хэн юм бэ гэх асуулт одоог хүртэл бүрхэг байна. 

Эх сурвалж: